काठमाडौं ।
नासाले आफ्नो एउटा अन्तरिक्ष यानलाई जानाजान एउटा क्षुद्रग्रहमा ठोक्काउने भएको छ र आफ्नो लक्ष्यको नजिक हुँदैछ।
डार्ट (DART) भनिने मिशन, वा डबल एस्टेरोइड पुनर्निर्देशन परीक्षण, १० महिना अघि प्रक्षेपण गरेपछि यहि सेप्टेम्बर २६ मा अन्तरिक्षमा रहेको सो चट्टानसंग ठोक्किने सीएनएनले उल्लेख गरेको छ।
अन्तरिक्ष यानले क्षुद्रग्रहको चन्द्रमामा हिर्काउने छ र यसले अन्तरिक्षमा क्षुद्रग्रहको गतिलाई कसरी असर गर्छ भनेर हेरिनेछ। अन्तरिक्ष यानद्वारा खिचिएका तस्बिरहरूको लाइभ स्ट्रिम अमेरिकी समयअनुसार साँझ ५:३० बजे सुरु हुने नासाको वेबसाइटमा उल्लेख छ। त्यो दिन असर बेलुका ७:१४ बजेतिर हुने अनुमान गरिएको छ।
डार्टले डिडिमोस भनिने पृथ्वीको नजिकको क्षुद्रग्रहको चन्द्रमा ‘डिमोर्फोस’मा हान्नेछ। डिमोर्फोस एउटा सानो चन्द्रमा हो जसले पृथ्वीको नजिकै रहेको क्षुद्रग्रह डिडिमोसको परिक्रमा गरिरहेको छ। यदि यो मिशन सफल भयो भने, अन्तरिक्ष यानले डिडिमोसको वरिपरि आफ्नो कक्षमा डिमोर्फोसको बाटो परिवर्तन गर्नेछ। डिमोर्फोसको कक्षमा कति परिवर्तन भयो भन्ने प्रभाव पछिका महिनाहरु र वर्षहरूमा पुष्टि हुनेछ।
क्षुद्रग्रह प्रणालीले पृथ्वीलाई कुनै खतरा नपार्ने नासाका अधिकारीहरूले भनेका छन्। मिशनले सुरक्षित वातावरणमा ग्रह रक्षा विधिहरू परीक्षण गर्ने लक्ष्य राख्छ।
प्रकाशित: ७ आश्विन २०७९, शुक्रबार
