काठमाडौं ।
महोत्तरीको बर्दीबासस्थित यातायात व्यवस्था कार्यालयले सेवाग्राहीको सहजताका लागि स्थानीय तहमार्फत सवारीचालक अनुमतिपत्र (लाइसेन्स) वितरण सुरु गरेको छ।
लाइसेन्स लिनकै लागि यातायात कार्यालयसम्म धाउनुपर्ने बाध्यता अन्त्य गर्ने उद्देश्यले सम्बन्धित पालिकासँग समन्वय गरी लाइसेन्स वितरणको व्यवस्था मिलाइएको कार्यालयले जनाएको छ। लामो समयदेखि कार्यालयमा छापिएर थन्किएका लाइसेन्ससमेत पालिकामार्फत सम्बन्धित सेवाग्राहीलाई उपलब्ध गराउन थालिएको हो।
यसैक्रममा बर्दीबास यातायात व्यवस्था कार्यालयबाट गौशाला नगरपालिकाअन्तर्गतका सन् २०२४ देखि तयार भएका १ हजार १३९ थान सवारीचालक अनुमतिपत्र गौशाला नगरपालिकाका नगरप्रमुख डा. दीपेन्द्र महतोलाई हस्तान्तरण गरिएको छ। लाइसेन्स बुझेसँगै नगरपालिकाले सूचना जारी गरी सम्बन्धित सेवाग्राहीलाई वितरण गर्न थालेको जनाएको छ।
गौशाला नगरपालिकाका अनुसार नगरपालिकामै लाइसेन्स वितरण भएपछि सेवाग्राहीले लाइसेन्स लिनकै लागि बर्दीबाससम्म पुग्नुपर्ने अवस्था अन्त्य भएको छ। स्थानीय तहबाटै सेवा उपलब्ध हुँदा समय र यातायात खर्च बचत हुनुका साथै सेवाग्राहीलाई प्रत्यक्ष लाभ पुग्ने अपेक्षा गरिएको छ।
गौशाला नगरपालिका महोत्तरी जिल्लाको मधेश प्रदेशमा रहेको स्थानीय तह हो। नगरपालिकाको आधिकारिक विवरणअनुसार यहाँ १२ वडा छन्।
यसैगरी जलेश्वर नगरपालिकाले पनि पालिकामै पुगेर लाइसेन्स वितरण गर्ने व्यवस्थाले स्थानीय सेवाग्राहीलाई प्रत्यक्ष लाभ पुगेको जनाएको छ। यातायात व्यवस्था कार्यालयले अन्य पालिकासँग पनि समन्वय गरी लाइसेन्स वितरणलाई स्थानीय तहसम्म विस्तार गर्ने तयारी गरेको जनाएको छ।
आजको गोरखापत्रबाट
प्रकाशित: ८ भाद्र २०८३, सोमबार
