काठमाडौं ।
संयुक्त राज्य अमेरिकास्थित क्यालिफोर्नियाको सान्टा मोनिकामा हल्लाको गुनासो बढेपछि स्थानीय अदालतले वेमोलाई रातिको समयमा आफ्नो चार्जिङ केन्द्र सञ्चालन गर्न रोक लगाएको छ।
लस एन्जलस सुपेरियर कोर्टका न्यायाधीश ब्राड्ली एस. फिलिप्सले यस साताको आदेशमा सान्टा मोनिका सहरले वेमोविरुद्ध दायर गरेको सार्वजनिक असुविधासम्बन्धी मुद्दामा प्रारम्भिक निषेधाज्ञा जारी गरेका हुन्।
सहरका अधिकारी र स्थानीय बासिन्दाका अनुसार वेमोको चार्जिङ केन्द्रमा लगातार आउने-जाने स्वचालित सवारीसाधनका कारण प्रकाश र ध्वनि प्रदूषण बढेको, साथै सडक र गल्लीमा अनावश्यक ट्राफिक जाम सिर्जना भएको आर्सटेक्निकाले उल्लेख गरेको छ।
चार्जिङ केन्द्रको छेउमा बस्ने दावी गरेका स्थानीय बासिन्दा क्रिस्टोफर पोटरले स्वचालित सवारीसाधन पार्किङ स्थानबाट पछाडि हट्दा आउने लगातार “बिप बिप बिप” आवाजले दिनको शान्ति र रातको निद्रा दुवैमा बाधा पुगेको बताएका छन्।
अदालतको आदेशअनुसार अब वेमोले ब्रडवेस्थित १२औँ र युक्लिड सडकको चार्जिङ केन्द्र राति ११ बजेदेखि बिहान ६ बजेसम्म सञ्चालन गर्न पाउने छैन। उक्त चार्जिङ केन्द्र निजी विद्यालयको ठीक अगाडि रहेको छ भने आसपास अपार्टमेन्ट र अन्य आवास पनि छन्। स्थानीय बासिन्दाले एक वर्षभन्दा लामो समयदेखि यसबारे गुनासो गर्दै आएका थिए।
आदेश लागू भएपछि स्थानीय बासिन्दाले फरक अनुभव गर्न थालेको बताएका छन्।
वेमोसम्बन्धी गुनासो संकलन गर्ने वेबसाइट बनाएका डिलन मुरले राति हिँड्दा अब झिंगुरको आवाजसम्म स्पष्ट सुन्न सकिने र वातावरण निकै शान्त भएको बताएका छन्।
आफ्नो नाम सार्वजनिक गर्न नचाहेका अर्का एक स्थानीय बासिन्दाले पनि अदालतको आदेश पालना गरेकोमा वेमोप्रति सन्तुष्टि व्यक्त गरेका छन्। उनका अनुसार राति २ बजेतिर बारहरू बन्द हुने समयमा चार्जिङ केन्द्रमा धेरै सवारीसाधन आउँदा विद्युतीय गाडीको तीव्र गति बढ्ने र घट्ने आवाजले ठूलो असुविधा हुने गरेको थियो।
सान्टा मोनिकाकी मेयर क्यारोलिन टोरोसिसले आफ्ना नागरिकले आफ्नै घरमा शान्तिपूर्वक सुत्न पाउने अधिकारमा सम्झौता हुन नसक्ने भन्दै अदालतको निर्णयले स्थानीय बासिन्दाले एक वर्षभन्दा बढी समयदेखि उठाउँदै आएको गुनासोलाई पुष्टि गरेको बताएकी छन्।
वेमोले भने अदालतको निर्णयविरुद्ध पुनरावेदन गरेको छ। कम्पनीले यस विषयमा तत्काल कुनै प्रतिक्रिया दिएको छैन।
वेमोले जनवरी २०२५ देखि उक्त चार्जिङ केन्द्र प्रयोग गर्न थालेको थियो। धेरै गुनासो र अनलाइन निवेदनपछि सान्टा मोनिका सहरले कम्पनीलाई रातिको सञ्चालन रोक्न निर्देशन दिएको थियो। त्यसपछि सहरले नोभेम्बर २०२५ मा वेमोविरुद्ध मुद्दा दायर गरेको थियो, जुन अझै विचाराधीन छ। वेमोले पनि यस मुद्दाको विरुद्धमा उल्टै मुद्दा दायर गरेको छ।
प्रकाशित: १८ श्रावण २०८३, सोमबार
