काठमाडौं ।
नयाँ अध्ययनअनुसार रुसी स्याटेलाइटहरूले युरोपभर जीपीएस सिग्नलमा अवरोध पुर्याएका छन्
रुसी उपग्रहहरूको एक सञ्जालले सन् २०१९ यता सम्भवतः दर्जनौं पटक युरोपभर जीपीएस सिग्नलमा छोटो समयका लागि अवरोध सिर्जना गरेको नयाँ अध्ययनले संकेत गरेको छ।
हालका वर्षहरूमा जीपीएस जामिङ नियमित चिन्ताको विषय बनेको छ र शुक्रबार रोमानियाको एक बन्दरगाहमा युक्रेनी ड्रोन खसालिएको घटनाको कारण पनि यहीलाई मानिएको थियो।
टेलिग्राफका अनुसार विश्वका विभिन्न भागका सेनाहरूले ड्रोन आक्रमणबाट जोगिन नियमित रूपमा जीपीएस जामिङ र स्पुफिङ प्रयोग गर्छन्। तर यस्ता अवरोध सामान्यतया निश्चित भौगोलिक क्षेत्रमा मात्र सीमित हुने गर्छन्।
नयाँ वैज्ञानिक शोधपत्रमा उल्लेख गरिएका घटनाहरू भने अन्तरिक्षबाट उत्पन्न भएको थाहा पाइएको पहिलोमध्येका घटनाहरू हुन् र यसका प्रभावहरू व्यापक हुन सक्ने बताइएको छ।
मस्कोले भने आफूले जीपीएस जामिङ गरेको आरोपलाई निरन्तर अस्वीकार गर्दै आएको छ।
यो अनुसन्धान विश्वप्रसिद्ध ग्लोबल नेभिगेसन स्याटेलाइट सिस्टम (जीएनएसएस) विशेषज्ञ तथा टेक्सास विश्वविद्यालय, अस्टिनस्थित रेडियोनेभिगेसन प्रयोगशालाका प्रमुख टड ई. हम्फ्रिसलगायतका अनुसन्धानकर्ताले गरेको बताइएको छ।
शुक्रबार प्रकाशित शोधपत्रमा वैज्ञानिकहरूले युरोप, ग्रीनल्यान्ड र क्यानडाभर रहेका स्टेशनहरूमा एकै समयमा जीपीएस सिग्नलमा अवरोध देखिएको बताएका छन्।
यो अवरोध सामान्यतया तीनदेखि पाँच सेकेन्डसम्म रहने गरेको र तथ्यांकले “घटनाको एउटै स्रोत रहेको” संकेत गरेको शोधपत्रमा उल्लेख छ।
शोधपत्रमा थप भनिएको छ, “प्रभावित स्थलमा रहेका रिसिभरहरू यति ठूलो भौगोलिक क्षेत्रमा फैलिएका छन् कि कुनै एक स्थल वा हवाई स्रोतले ती सबैमा प्रभाव पार्न सक्दैन। त्यसैले यसको स्रोत अन्तरिक्षमा रहेको हुन सक्ने परिकल्पना गरिएको हो।”
यी अवरोधहरू मुख्यतः कार्यदिनहरूमा र कार्यालय समयमै देखिएका थिए।
शोधपत्रका अनुसार यसले “मानवीय संलग्नता” को संकेत गर्छ, किनभने यदि यो पूर्ण रूपमा अनियमित प्राकृतिक घटना भएको भए विभिन्न समयमा पनि देखिनुपर्ने थियो।
प्रकाशित: २६ जेष्ठ २०८३, मंगलवार
