काठमाडौं ।
मेटाले कुनै औपचारिक घोषणा बिना ‘फोरम’ नामक नयाँ एप सार्वजनिक गरेको छ। गीकआउट न्युजलेटरका म्याट नाभाराले एप स्टोरमा उक्त एप फेला पारेका हुन्, जहाँ यसलाई “तपाईंका लागि सबैभन्दा महत्वपूर्ण वार्तालापका लागि समर्पित स्थान” भनेर वर्णन गरिएको छ। यो एप विशेषगरी फेसबुक ग्रुप्सका लागि बनाइएको बताइएको छ।
नाभाराका अनुसार मेटाले यो एपलाई “वास्तविक मानिसबाट वास्तविक उत्तर” प्राप्त गर्ने माध्यमका रूपमा प्रस्तुत गरिरहेको छ, जसले गर्दा यसको उद्देश्य रेडिटजस्तै देखिन्छ।
फोरम प्रयोग गर्न प्रयोगकर्तासँग फेसबुक खाता हुनुपर्नेछ। लगइन गरेपछि उनीहरूको प्रोफाइल र गतिविधि स्वतः एपमा देखिनेछ। यसले रेडिट जस्तो पूर्ण रूपमा गोप्य वार्तालापको सुविधा भने दिँदैन, तर मुख्य फेसबुक एपमा जस्तै प्रयोगकर्ताले गोप्य प्रयोगकर्ता नाम प्रयोग गर्न सक्नेछन्। यद्यपि समूह प्रशासकहरूले उनीहरूको वास्तविक परिचय भने देख्न सक्नेछन्।
फेसबुकको मुख्य फिडमा साथीहरूका पोस्ट, समूहका पोस्ट, फलो गरिएका पेज र एल्गोरिदमले सुझाएका सामग्री देखाइने भए पनि फोरमको फिडमा मुख्य रूपमा विभिन्न समूहका वार्तालापहरू देखाइनेछ।
इन्ग्याजेटका अनुसार पहिलो पटक लगइन गर्दा प्रयोगकर्तालाई आफूले बढी हेर्न चाहेका विषय छान्न भनिने भएकाले एपले उनीहरूको रुचिअनुसार अन्य समूहका पोस्ट पनि देखाउने सम्भावना छ। फोरममा समूहमा गरिएको पोस्ट मुख्य फेसबुक एपमा पनि देखिनेछ र त्यसको उल्टो पनि लागू हुनेछ।
मेटाले समूह केन्द्रित एप सार्वजनिक गरेको यो पहिलो पटक भने होइन। कम्पनी फेसबुक नाममै रहेको समयमा उसले छुट्टै ग्रुप्स एप ल्याएको थियो, जसलाई सन् २०१७ मा बन्द गरिएको थियो।
नयाँ फोरम एपमा एआई आधारित केही सुविधा पनि समावेश गरिएको छ। ‘आस्क’ नामक सुविधाले विभिन्न समूहबाट उत्तर संकलन गरेर प्रयोगकर्ताको प्रश्नको जवाफ दिन सक्छ, जसले आवश्यक जानकारी खोज्न प्रत्येक समूह छुट्टाछुट्टै हेर्नुपर्ने आवश्यकता हटाउने मेटाको दावी छ। अर्को एआई सुविधा प्रशासक सहायक हो, जसले समूह सञ्चालकलाई समूह व्यवस्थापनमा सहयोग गर्नेछ।
कम्पनीले एपबारे सोधिएको प्रश्नमा हाल यसको परीक्षण भइरहेको जनाएको छ। मेटाका प्रवक्ताले “हामीले मानिसलाई हाम्रो एपमार्फत कुन सुविधा उपयोगी र रोचक लाग्छ भनेर बुझ्न विभिन्न नयाँ उत्पादन सार्वजनिक रूपमा परीक्षण गर्छौं,” भने।
प्रकाशित: ९ जेष्ठ २०८३, शनिबार
