काठमाडौं ।
ओपनएआईको कोडेक्स अब मोबाइलमा पनि आउने घोषणा गरेको छ।
करिब एक वर्षअघि सार्वजनिक गरिएको कोडिङ उपकरण कोडेक्स अब मोबाइलमा पनि उपलब्ध हुने भएको छ। यसलाई अब ChatGPT एपमा एकीकृत गरिएको छ, जसले प्रयोगकर्तालाई टाढाबाटै आफ्नो डेभलपमेन्ट वर्कफ्लो निगरानी र व्यवस्थापन गर्न सक्ने बनाउँछ।
नयाँ फिचरले प्रयोगकर्तालाई कोडेक्स चलिरहेको कुनै पनि डिभाइसमा यसको लाइभ वातावरण हेर्न सक्ने सुविधा दिन्छ। कम्पनीले बिहीबार यो परिवर्तन घोषणा गरेको हो। हाल प्रिभ्यु चरणमा रहेको यो अपडेट अहिले आईओएस र एण्ड्रोइडका सबै योजनामा उपलब्ध छ।
“यो केवल एउटै कामलाई टाढाबाट नियन्त्रण गर्ने वा कम्प्युटरमा नयाँ काम पठाउने सुविधा मात्र होइन,” ओपनएआईले वक्तव्यमा भनेको छ। “तपाईंले आफ्नो फोनबाट सबै थ्रेडमा काम गर्न, आउटपुट समीक्षा गर्न, आदेश स्वीकृत गर्न, मोडेल परिवर्तन गर्न वा नयाँ काम सुरु गर्न सक्नुहुन्छ।”
टेकक्रञ्चका अनुसार गत महिना ओपनएआईले कोडेक्सलाई डेस्कटप वातावरणमा ब्याकग्राउन्डमा चल्ने क्षमता पनि दिएको थियो, जसले यसलाई विभिन्न काम स्वतः गर्न सक्षम बनाएको थियो। यस महिनाको सुरुआतमा कम्पनीले क्रोम एक्सटेन्सन पनि सार्वजनिक गरेको थियो, जसले एजेन्टलाई लाइभ ब्राउजर सेसनमा काम गर्न दिने सुविधा दिन्छ।
फेब्रुअरीमा एन्थ्रोपिकले पनि यस्तै फिचर ‘रिमोट कन्ट्रोल’ सार्वजनिक गरेको थियो, जसले प्रयोगकर्तालाई टाढाबाटै क्लोड कोडको काम निगरानी गर्न अनुमति दिन्छ।
ओपनएआई र एन्थ्रोपिक दुवैले लगातार नयाँ फिचर सार्वजनिक गरिरहनुले कुन कम्पनीको एजेन्टिक कोडिङ उपकरण सबैभन्दा धेरै प्रयोग हुने बन्ने भन्ने विषयमा तीव्र प्रतिस्पर्धा भइरहेको देखाउँछ। पछिल्लो एक वर्षमा एन्थ्रोपिकको क्लोड कोड व्यवसाय तथा प्रविधि क्षेत्रका पेशाकर्मीबीच लोकप्रिय बन्दै गएको छ, यद्यपि दुवै उपकरण अझै व्यापक रूपमा प्रयोग भइरहेका छन्।
प्रकाशित: ३ जेष्ठ २०८३, आईतवार
