काठमाडौं ।
क्षेत्रीय प्रतिस्पर्धात्मकता सुधार गर्ने उद्देश्यसहितको नर्डिक गठबन्धनमा एरिक्सन सहभागी भएको छ।
विश्वव्यापी प्रतिस्पर्धामा आफूलाई मजबुत बनाउनका लागि यूरोपेली संघ (ईयू) ले प्रभावकारी कदम चाल्ने प्रतीक्षा नगर्ने निर्णय नर्डिक क्षेत्रले गरेको देखिन्छ।
टेलिकम्स डटकमका अनुसार ‘नर्डिक कम्पास’ ले आफूलाई उद्योग क्षेत्रका लागि एउटा गोलमेच मञ्चका रूपमा वर्णन गरेको छ, जसले “पूँजी बजार, डीप टेक, रक्षा र ऊर्जा क्षेत्रमा ठोस पहलहरू कार्यान्वयन तथा विस्तार गर्न नर्डिक क्षेत्रका केही ठूला कम्पनी र फाउन्डेशनहरूलाई एकताबद्ध गर्ने” बताएको छ।
स्पष्ट रूपमा उल्लेख नगरिए पनि यसको गठनलाई यूरोपेली संघप्रतिको असन्तुष्टिको संकेतका रूपमा हेरिएको छ, किनभने विश्वव्यापी व्यापारिक र राजनीतिक चुनौतीहरूमा ईयूको सुस्त र अपर्याप्त प्रतिक्रियाको लामो समयदेखि आलोचना हुँदै आएको छ।
अपेक्षा गरिएझैं एरिक्सन र नोकिया दुवै यसमा सहभागी भएका छन्, तर यस कदमबारे प्रेस विज्ञप्ति जारी गर्दै उत्साह देखाउने काम भने एरिक्सनले मात्रै गरेको छ। कम्पनीले “क्षेत्रीय सहकार्यलाई अहिलेसम्म पर्याप्त रूपमा उपयोग गरिएको छैन” भनेको छ।
क्षेत्रीय सहकार्य गर्ने मुख्य थलो ईयू नै भए पनि डेनमार्क (ग्रीनल्यान्डसहित), फिनल्यान्ड, आइसल्यान्ड, नर्वे र स्विडेन सम्मिलित नर्डिक देशहरूले ईयूको प्रतीक्षा नगर्ने निर्णय गरेको देखिन्छ।
“बलियो नवप्रवर्तन प्रणाली भएको नर्डिक क्षेत्रले युरोपको प्रतिस्पर्धात्मकता सुदृढ बनाउन महत्वपूर्ण भूमिका खेल्न सक्छ,” एरिक्सनको क्लाउड सफ्टवेयर एन्ड सर्भिसेस व्यवसाय प्रमुख जेनी लिन्डक्भिस्टले भनिन्। “नर्डिक क्षेत्रका साझेदारहरूसँग मिलेर एरिक्सनले प्रविधि र उन्नत कनेक्टिभिटीमार्फत क्षेत्र र युरोपकै दिगो विकासलाई कसरी अघि बढाउन सकिन्छ भन्ने देखाउनेछ।”
उनले कूटनीतिक शैलीमा धारणा राखे पनि ईयूले बाहिरी सुझाव सहज रूपमा स्वीकार गर्ने सम्भावना कम रहेको टिप्पणी गरिएको छ। यद्यपि ‘नर्डिक कम्पास’ को अध्यक्षका रूपमा यिर्की काटाइननलाई नियुक्त गरेर यस पहलले केही बलियो आधार बनाएको मानिएको छ। फिनल्यान्डका पूर्वप्रधानमन्त्री काटाइनन सन् २०१९ सम्म रोजगारी, वृद्धि, लगानी तथा प्रतिस्पर्धात्मकतासम्बन्धी युरोपेली आयोगका उपाध्यक्ष समेत रहेका थिए।
“युरोप अहिले प्रतिस्पर्धात्मकता र नविकरणबारे समयानुकूल बहसमा संलग्न छ,” काटाइननले भने। “तर युरोपस्तरीय प्रक्रिया समय लाग्ने खालका छन्, जबकि नर्डिक देशहरू छिटो अघि बढ्न र प्रभावकारी कार्यान्वयन देखाउन सक्षम छन्। नर्डिक देश र कम्पनीहरूले संयुक्त रूपमा काम गर्दै बजार निर्माण गर्न, मापदण्ड तय गर्न र आजका सबैभन्दा महत्वपूर्ण क्षेत्रमा नवप्रवर्तनलाई अघि बढाउन सक्ने अवसरलाई उपयोग गर्न ‘नर्डिक कम्पास’ स्थापना गरिएको हो।”
ईयू प्रतिको असन्तुष्टि उनीहरूले लुकाउन खोजेका छैनन्। युरोपेली मुलुकहरूले निष्क्रिय रूपमा अवस्थालाई स्वीकार गर्नुको सट्टा पहल लिन खोजेको देखिनु सकारात्मक भएको टिप्पणी गरिएको छ।
‘नर्डिक कम्पास’ बारे थप जानकारी यसको आधिकारिक वेबसाइटमा उपलब्ध छ। यसले आफ्नो प्रारम्भिक योजना आगामी नोभेम्बरमा स्विडेनको गोथेनबर्गमा हुने सम्मेलनमा सार्वजनिक गर्ने तयारी गरेको छ। सुरुआत धेरै तीव्र नभए पनि ईयूको तुलनामा यो प्रक्रिया अझै छिटो मानिएको छ।
प्रकाशित: ३० बैशाख २०८३, बुधबार
