काठमाडौं ।
इलन मस्क, टिम कूक र केली अर्टबर्ग यस साता अमेरिकी राष्ट्रपति डोनाल्ड ट्रम्पसँग चीन भ्रमणमा जाने भएका छन्। ह्वाइट हाउसका एक अधिकारीले रोयटर्सलाई यो जानकारी दिएका हुन्।
भ्रमणमा सहभागी हुने अन्य व्यक्तिहरूमा मेटाकी डिना पावेल म्याक्कर्मिक, ब्ल्याकरकका ल्यारी फिङ्क, ब्ल्याकस्टोनका स्टेफन स्वार्जम्यान, माइक्रोनका सञ्जय मेह्रोत्रा, मास्टरकार्डकाका माइकल मिएबाक, क्वालकमका क्रिश्टियानो आमोन र भिजाका र्यान म्याकइनेर्नी रहेका छन्।
सिस्कोका सीईओ चङ्क रबिन्सलाई पनि ह्वाइट हाउसले चीन भ्रमणमा निमन्त्रणा दिएको थियो। तर कम्पनीको आम्दानी प्रतिवेदन यसै साता सार्वजनिक हुने भएकाले उनी सहभागी हुन नसकेको कम्पनीका प्रवक्ताले बताएका छन्।
अमेरिका र चीनबीच पारस्परिक व्यापार तथा लगानी सहज बनाउन विभिन्न फोरम स्थापना गर्ने सहमति हुने अपेक्षा गरिएको छ। साथै चीनले बोइङका विमान, अमेरिकी कृषि र ऊर्जा क्षेत्रसँग सम्बन्धित खरिद घोषणा गर्न सक्ने रोयटर्सले सोमबार जनाएको थियो।
चीन र अमेरिकाबीच हुने शिखर बैठकमा ठूला व्यापारिक सम्झौता वा खरिद घोषणा हुने क्रम सामान्य मानिन्छ।
भ्रमणमा कारगिलका ब्रायन साइक्स, कोहेरेन्टका जिम एण्डरसन र इलुमिनाका ज्याकब थेसेन पनि सहभागी हुनेछन्।
दुवै देशले व्यापार युद्धमा भएको अस्थायी सम्झौता लम्ब्याउने विषयमा पनि छलफल गर्नेछन्। उक्त सम्झौताअनुसार चीनबाट अमेरिकातर्फ दुर्लभ खनिज पदार्थको आपूर्ति जारी राखिएको छ। तर यो सम्झौता यसै साता थपिने वा नथपिने स्पष्ट छैन।
अर्टबर्गले अप्रिलमा रोयटर्ससँग कुरा गर्दै ट्रम्प प्रशासनले चीनबाट लामो समयदेखि अपेक्षित ठूलो अर्डर खुलाउन सहयोग गर्ने आशा गरेको बताएका थिए।
चीन र अमेरिकी विमान निर्माता बोइङबीच लामो समयदेखि वार्ता भइरहेको छ। उद्योग स्रोतहरूका अनुसार सम्झौतामा ५०० वटा ७३७म्याक्स जेट र जीई इन्जिन प्रयोग भएका दर्जनौँ वाइडबडी विमान समावेश हुन सक्छन्। यो सन् २०१७ पछि चीनबाट बोइङका लागि पहिलो ठूलो अर्डर हुनेछ। यस्तो घोषणा भएमा शिखर बैठकका नेताहरूका लागि ठूलो सफलता मानिनेछ। यो इतिहासकै सबैभन्दा ठूलो विमान अर्डर पनि हुन सक्छ।
एनभिडियाका सीईओ जेन्सेन हुआङ भने ट्रम्पसँग बेइजिङ जाने छैनन्। यसबारे जानकारी भएका एक स्रोतले सोमबार बताएका हुन्।
स्रोतका अनुसार हुआङलाई निमन्त्रणा गरिएको थिएन। ह्वाइट हाउसले यस भ्रमणमा कृषि र व्यावसायिक उड्डयन, विशेषगरी बोइङ विमान खरिदसम्बन्धी विषयलाई प्राथमिकता दिएको छ। ह्वाइट हाउसले यसबारे टिप्पणी मागमा तत्काल प्रतिक्रिया दिएको छैन।
ट्रम्पले कार्यकालमा आएपछि हुआङसँग राम्रो सम्बन्ध विकास गरेका छन्। उनले कम्पनीका एभ२०० एआई चिप चीन निर्यात गर्न अनुमति दिने सहमति पनि दिएका थिए। तर ती चिप हालसम्म बिक्री भएका छैनन्। वाणिज्य सचिव होवार्ड लुटनिकले अप्रिल २२ मा चिनियाँ कम्पनीहरूले चीन सरकारबाट खरिद अनुमति लिन कठिनाइ भइरहेको बताएका थिए।
ट्रम्प र चिनियाँ राष्ट्रपति शि जिनपिङबीच पछिल्लो भेट अक्टोबरमा दक्षिण कोरियामा भएको थियो। त्यतिबेला दुवैले कडा व्यापार युद्ध रोक्ने सहमति गरेका थिए। उक्त व्यापार युद्धमा अमेरिकाले चिनियाँ सामानमा सय प्रतिशतभन्दा बढी भन्सार शुल्क लगाएको थियो भने चीनले दुर्लभ खनिजको विश्वव्यापी आपूर्ति सीमित गर्ने चेतावनी दिएको थियो।
प्रकाशित: २९ बैशाख २०८३, मंगलवार
