काठमाडौं ।
एप्पलका सेयरहरू शुक्रबार प्रि–मार्केट कारोबारमा ३ प्रतिशतले बढेका छन्। आइफोन निर्माता कम्पनीले चार वर्षभन्दा बढी समयपछि सार्वजनिक गरेको सबैभन्दा बलियो त्रैमासिक बिक्रीले यस्तो देखाएको हो।
नयाँ सीईओलाई जिम्मेवारी सुम्पने तयारी गरिरहेको बेला यसले कम्पनीको गति देखाएको हो।
यसको पछिल्लो आईफोन १७ प्रो सिरिज र हालै सार्वजनिक गरिएको सस्तो म्याकबुक निओ ल्यापटपले उपभोक्ता इलेक्ट्रोनिक्स क्षेत्रमा मेमोरी चिप अभावका कारण बढेको मूल्यबीच समग्र माग कमजोर भए पनि खरिदकर्तालाई आकर्षित गरिरहेका छन्।
जनवरी–मार्च त्रैमासिकमा एप्पलको नाफा मार्जिन र यसको आर्थिक वर्षको तेस्रो त्रैमासिकको पूर्वानुमान वाल स्ट्रिटको अनुमानभन्दा माथि भए पनि बाहिरिँदै गरेका सीईओ टिम कुकले जुनदेखि मेमोरी लागत बढ्दै जाँदा व्यवसायमा दबाब पर्ने चेतावनी दिएका छन्।
आइफोनका लागि आवश्यक उन्नत प्रोसेसरहरूको सीमित आपूर्तिले बलियो मागबाट पूरा फाइदा लिन एप्पललाई अवरोध पुर्याइसकेको छ। यी चिपहरू ताइवानको टीएसएमसीले उत्पादन गर्छ जुन एआई प्रोसेसरहरूको प्रमुख उत्पादक हो। विश्लेषकहरूका अनुसार पुराना आपूर्तिकर्तासँगको बलियो सम्बन्धका कारण एप्पल प्रतिस्पर्धीहरूभन्दा मेमोरी चिप सुरक्षित गर्न राम्रो स्थितिमा हुन सक्छ, तर यसले यसै वर्ष पछि मूल्य बढाउनुपर्ने हुन सक्छ।
आईडीसीकी वरिष्ठ अनुसन्धान निर्देशक नबिला पपलले भनिन्, “मुख्य प्रश्न भनेको मूल्य बढाउने र नाफा कायम राख्नेबीच सन्तुलन मिलाउने कि मूल्य नबढाई बजार हिस्सा बढाउने भन्ने हुनेछ।”
उनले थपिन्, “मेरो विचारमा एप्पलले आगामी पतझडमा हुने लन्चमा प्रो र प्रो म्याक्सको मूल्य बढाउनेछ। नबढाए पनि २२०० डलरभन्दा धेरै पर्ने अपेक्षा गरिएको उच्चस्तरीय फोल्डेबल आइफोनले बढेको लागत सन्तुलन गर्न मद्दत गर्नेछ।”
नयाँ सीईओका लागि परिणाम सकारात्मक संकेत
रोयटर्सका अनुसार हालको त्रैमासिकका लागि १४ प्रतिशत देखि १७ प्रतिशत बिक्री वृद्धि हुने पूर्वानुमानसमेत समावेश यी परिणामहरूले सेप्टेम्बरमा हार्डवेयर प्रमुख जोन टर्नसले सीईओ पद सम्हाल्नुअघि कम्पनीका लागि सकारात्मक संकेत दिएका छन्।
कुक भने कार्यकारी अध्यक्षका रूपमा रहनेछन्। यो परिवर्तन एप्पलले एआई फिचर र पूर्वाधारमा छिटो अघि बढेका प्रतिस्पर्धी माइक्रोसफ्ट र अल्फाबेटसँगको दूरी घटाउने प्रयास गरिरहेको समयमा भइरहेको छ।
लगानीकर्ताहरूले जुनमा हुने वार्षिक सफ्टवेयर डेभलपर सम्मेलनमा एप्पलका एआई योजनाबारे थप विवरण पाउने अपेक्षा गरिएको छ। केही विश्लेषकहरूले एप्पलले अब आफ्नो शुद्ध नगद (नगदबाट ऋण घटाएर बाँकी) शून्य नजिक ल्याउने लक्ष्य नराख्ने निर्णयले एआई युगमा वित्तीय स्थिति राम्रोसँग व्यवस्थापन गर्न सहयोग पुर्याउन सक्ने बताएका छन्।
टीडी काउएनका विश्लेषकहरूका अनुसार यस निर्णयले कम्पनीलाई ब्यालेन्स–शीटमा बढी लचकता दिँदै उच्च लागत सहन, सेयर पुनःखरिदलाई समर्थन गर्न र पूँजीलाई रणनीतिक रूपमा प्रयोग गर्न अनुमति दिन्छ।
प्रकाशित: २० बैशाख २०८३, आईतवार
