काठमाडौं ।
भेराइजनले फिफा विश्वकप २०२६का लागि स्टेडियम सञ्जाललाई अझ शक्तिशाली बनाएको छ।
फिफाले आगामी विश्वकपमा भेराइजनका फाइभजी, फिक्स्ड वायरलेस एक्सेस (एफडब्लूए) र प्रसारण समाधानहरू प्रयोग गर्नेछ, जसमा ‘ठूला बल आकारका एन्टेना’ समेत समावेश छन्।
जुनमा प्रतियोगिता सुरु हुनुअघि भेराइजनले क्यानडा, मेक्सिको र अमेरिका रहेका होस्ट स्टेडियम, सहर र फिफा फ्यान फेस्टिभल स्थानहरूमा प्रयोग हुने सञ्जाल समाधान र सेवाहरू सार्वजनिक गरेको छ।
टेलिकम्स डटकमका अनुसार प्रत्येक खेलका लागि एक स्टेडियमभित्र मात्र दर्शकहरूले ५० टेराबाइटभन्दा बढी डाटा प्रयोग गर्ने अपेक्षा गरिएको छ, जुन तीन वर्षभन्दा बढी समयसम्म एचडी भिडियो स्ट्रिमिङ गरेजत्तिकै बराबर हुने बताइएको छ।
भेराइजनले सञ्जालमा धेरै सुधार गरेको छ, जसमा सबै होस्ट स्टेडियममा फाइभजी स्पेक्ट्रम थपेर क्षमता करिब ३ देखि ५ गुणासम्म बढाइएको छ। साथै, सिटमुनि हजारौं एन्टेना जडान गरिएको छ र माथिल्लो भागमा रहेका दर्शकका लागि लक्षित फोरजी र फाइभजी कभरेज दिन ‘ठूला बल आकारका एन्टेना’ पनि राखिएको छ।
यससँगै स्टेडियम वरपर कभरेज र क्षमता बढाउन करिब १४० साना सेल र अस्थायी सेल साइटहरू पनि प्रयोग गरिएको छ।
यी सञ्जाल सुधारमार्फत उच्च क्षमता भएका फाइबर र वेभ सेवाहरू प्रयोग गरी ब्रोडकास्ट कन्ट्रिब्युशन नेटवर्क (बीसीएन) सञ्चालन गरिनेछ जसले इन्टरनेशनल ब्रोडकास्ट सेन्टर (आईबीसी) का लागि उच्च गुणस्तरको एचडी प्रसारण सुनिश्चित गर्नेछ।
स्टेडियमभित्र निजी फाइभजी सञ्जाल पनि प्रयोग गरिनेछ, जसमा लेनोभो रेफ्री भ्यू बडी क्यामरा जस्ता प्रविधि समावेश छन्, जसले रेफ्रीको मैदानभित्रको दृष्टिकोण देखाउनेछ। साथै, फाइभजी एफडब्लूए प्रयोग गरेर पप-अप सेवा, खुद्रा तथा सामग्री बिक्री स्थल र व्यवस्थापनसम्बन्धी कार्यहरू सञ्चालन गरिनेछ, जसमा नेटवर्क स्लाइसिङ पनि समावेश हुनेछ।
फिफा का प्रविधि निर्देशक नाचो फ्रेस्कोले भने, “भेराइजन सँगको सहकार्यले फिफा विश्वकप २०२६लाई पूर्ण रूपमा जोडिएको र अविस्मरणीय कार्यक्रम बनाउने लक्ष्य साकार पार्न महत्वपूर्ण भूमिका खेलेको छ। यस प्रविधिले स्टेडियमभित्र र बाहिर दुवै ठाउँमा दर्शकको अनुभव सुधार गर्ने मात्र होइन, होस्ट समुदायका लागि दीर्घकालीन डिजिटल पूर्वाधार पनि निर्माण गर्नेछ।”
भेराइजन बिजनेसका सीईओ काइल म्यालडीले भने, “फिफा विश्वकप २०२६केवल खेल मात्र होइन, प्रविधि र समुदाय एक हुने क्षण हो। हाम्रो फाइभजी र फाइबर सञ्जालले दर्शकका लागि सहज र अविस्मरणीय अनुभव सिर्जना गर्नुका साथै होस्ट सहरहरूका लागि दीर्घकालीन डिजिटल प्रभाव छोड्नेछ।”
गत वर्षको अन्त्यतिर एमके डन्स स्टेडियममा एआई र फाइभजी परीक्षण गरिएको थियो जुन युनिभर्सिटी अफ ब्रिस्टल स्मार्ट इन्टरनेट ल्याब, मादेभोलगायत उद्योग साझेदारसँग मिलेर वीभर ल्याब्सको नेतृत्वमा प्रोजेक्ट अराना अन्तर्गत विकास गरिएको थियो।
यस प्रविधिबाट बहु-क्यामेरा एङ्गलबाट उच्च गुणस्तरको लाइभ भिडियो स्ट्रिमिङ, एआईमा आधारित टोली प्रदर्शन विश्लेषण, खेलाडीको तथ्याङ्क, इन्टरएक्टिभ च्याटबोट, थ्रीडी स्टेडियम म्यापिङ, वास्तविक समय लाइन नेभिगेसन, खाना अर्डर र सुरक्षा सुविधाहरू उपलब्ध गराउने लक्ष्य राखिएको छ।
प्रकाशित: ५ बैशाख २०८३, शनिबार
