उबर र नुरो मिलेर सान फ्रान्सिस्कोमा सुरु गरे प्रिमियम रोबोट्याक्सी सेवाको परीक्षण

काठमाडौं ।

उबर र नुरोले मिलेर सान फ्रान्सिस्कोमा प्रिमियम रोबोट्याक्सी सेवा परीक्षण सुरु गरेका छन्।

यदि अब सेन्सरहरूले सजिएको र नुले विकास गरेको सेल्फ-ड्राइभिङ प्रणाली भएको लुसिड ग्राभिटी एसयूभी सान फ्रान्सिस्कोमा गुडिरहेको देखिएमा सम्भवतः त्यो उबर कर्मचारीले लिएको यात्रा हुन सक्छ।

केही छानिएका उबरकर्मचारीहरूले अब उबरएपमार्फत लुसिड रोबोट्याक्सी बुक गर्न सक्ने टेकक्रञ्चले उल्लेख गरेको छ जुन यस वर्षको अन्त्यतिर हुने सार्वजनिक सुरुवातअघि परीक्षणको पछिल्लो चरण हो।

सोमबार प्रकाशित ब्लगमार्फत अपडेट दिँदै नुरोले यी सवारी साधनहरू स्वायत्त मोडमा चलिरहेको र सुरक्षा लागि चालक सिटमा मानव अपरेटर पनि राखिएको जानकारी दिएको छ।

यद्यपि यो अझै सार्वजनिक सुरुवात होइन, यसले जुलाई २०२५ मा साझेदारी र बहु-मिलियन डलर लगानी घोषणा गरेयता कम्पनीहरूको प्रगति देखाउँछ। उबरले लुसिड मोटर्समा ३०० मिलियन डलर लगानी गरेको छ र आगामी छ वर्षमा कम्तीमा २० हजार वटा ग्राभिटी एसयूभी किन्ने सहमति पनि गरेको छ।

यी इलेक्ट्रिक सवारीहरू नुरोको स्वायत्त प्रणालीले सुसज्जित छन्, जुन एनभिडियाको ड्राइभ एजीएक्स थोर कम्प्युटरबाट सञ्चालित हुन्छ। जनवरीमा सार्वजनिक गरिएको लुसिड ग्राभिटी रोबोट्याक्सीमा उच्च-रिजोल्युसन क्यामेरा, सोलिड-स्टेट लिडार सेन्सर र राडार जडान गरिएको छ, जसले सवारीलाई वास्तविक वातावरण बुझ्न र सञ्चालन गर्न मद्दत गर्छ।

उबरले नुरोमा पनि बहु-सय मिलियन डलर बराबरको गोप्य लगानी गरेको छ।

योजना अनुसार, प्रिमियम रोबोट्याक्सी सेवा उबरआफैंले (सम्भवतः तेस्रो पक्षको सहयोगमा) स्वामित्व र सञ्चालन गर्नेछ। नियामक फाइलिङ अनुसार, परिमार्जित लुसिड ग्राभिटी सवारीहरूको उत्पादन २०२६ को अन्त्यतिर सुरु हुने अपेक्षा गरिएको छ।

नुरो ले बन्द ट्र्याक परीक्षण पूरा गरी गत वर्षको अन्त्यतिर सार्वजनिक सडकमा लुसिड ग्राभिटी एसयूभीको पहिलो परीक्षण सुरु गरेको थियो। हाल नुरो सँग यसको स्वायत्त प्रणाली जडित १०० वटा लुसिड ग्राभिटी एसयूभीहरू इन्जिनियरिङ फ्लीटमा छन्, जसले विभिन्न अमेरिकी सहर र राज्यहरूमा वास्तविक डाटा सङ्कलन र परीक्षणमा प्रयोग भइरहेका छन्।

नुरोका अनुसार कर्मचारीहरूसँग गरिने परीक्षण यात्राले स्वायत्त प्रणाली, सवारी र यात्रु अनुभवबीचको समन्वय मूल्यांकन गर्न मद्दत गर्छ। यसले रोबोट्याक्सी सेवामा चुनौतीपूर्ण मानिने यात्रु उठाउने र झार्ने प्रक्रियाको परीक्षण गर्न पनि सहयोग पुर्‍याउँछ।