विज्ञापनजस्ता देखिने सुझावहरु बन्द गरेको ओपनएआईको भनाइ

काठमाडौं ।

ओपनएआईले हाल च्याटजीपीटीमा कुनै विज्ञापन नभएको र विज्ञापन परीक्षण पनि चलिनरहेको बताएको छ। तर कम्पनीका मुख्य अनुसन्धान प्रमुख मार्क चेन् ले भर्खरका प्रोमोशनल मेसेजहरूको कारण प्रयोगकर्ता अनुभवमा कमजोरी आएको स्वीकार गरेका छन् र यसलाई सुधार्ने काम भइरहेको बताएका छन्।

चेन् सहित अन्य ओपनएआई अधिकारीहरूले पेलोटन र टार्गेट जस्ता कम्पनीका प्रोमोशनल मेसेज देखिएको भन्दै गुनासो गरेका भुक्तानी गर्ने प्रयोगकर्ताहरूका पोस्टहरूको जवाफ दिइरहेका थिए।

कम्पनीले अक्टोबरमा घोषणा गरिएको च्याटजीपीटी एप प्लेटफर्ममा बनेका एपहरू देखाउने नयाँ तरिका परीक्षण मात्र गरिरहेको र ती सुझावहरूमा कुनै आर्थिक पक्ष नभएको खुलाएको छ। विज्ञापनको गुनासो गर्ने एक प्रयोगकर्ताले सशुल्क प्रयोगकर्ताको मानहानी नगर्न आग्रह गरेका थिए। यस्तै च्याटजीपीटी प्रमुख निक टरलीले शुक्रबार “च्याटजीपीटी मा विज्ञापनबारे धेरै भ्रम फैलिएको” बताएका थिए।

उनले भने, “विज्ञापनका लागि कुनै लाइभ परीक्षण छैन। देखिएका कुनै पनि स्क्रीनशटहरू वास्तविक होइनन् वा विज्ञापन होइनन्। भविष्यमा विज्ञापन ल्याउने निर्णय गरेमा अहिलेकै जस्तो जिम्मेवारीपूर्वक अघि बढाइनेछ। मानिसहरू च्याटजीपीटी माथि भरोसा गर्छन् र हामीले गर्ने हरेक काम त्यसको सम्मानमा हुनेछ।”

यही दिन मार्क चेन् ले अझै क्षमापूर्वक प्रतिक्रिया दिँदै यो विवाद प्रयोगकर्ताको मात्र भ्रम नभएको स्वीकार गरे।

उनले भने, “विज्ञापनजस्तै देखिने कुनै पनि कुरा धेरै सावधानीपूर्वक ह्यान्डल गर्नुपर्छ, र हामी त्यसमा कमजोर पर्यौँ। मॉडलको शुद्धता सुधार्ने क्रममा यस प्रकारका सुझावहरू हामीले अहिले बन्द गरेका छौँ। प्रयोगकर्ताले चाहेमा यस्तो फीचर घटाउन वा बन्द गर्न सकियोस् भन्ने विकल्पहरू पनि हेर्दैछौँ।”

यस वर्षको सुरुमा इन्स्टाकार्ट र फेसबुकका पूर्व कार्यकारी फिजी सुमो ओपनएआईमा एप्लिकेसनहरूका सीईओका रूपमा आएका थिए र कम्पनीको विज्ञापन व्यवसाय विस्तार गर्ने अपेक्षा गरिएको थियो। तर वाल स्ट्रिट जर्नलका अनुसार यसै हप्ता ओपनएआईका सीईओ साम अल्टम्यानले पठाएको एउटा मेमोलाई “कोड रेड” भन्दै च्याटजीपीटीको गुणस्तर सुधारलाई शीर्ष प्राथमिकता दिने र विज्ञापनसहित अन्य प्रोजेक्टहरूलाई पछाडि धकेल्ने उल्लेख गरिएको छ।