एप्पलको एआई प्रमुख राजीनामा दिँदै: को आउँदैछन् उनको ठाउँमा?

काठमाडौं ।

२०१८ देखि एप्पलको एआई प्रमुख रहेका जोन जियानान्ड्रियाले पदबाट राजीनामा दिने भएका छन्। उनी आगामी वसन्त ऋतुसम्म सल्लाहकारका रूपमा भने रहने बुझिएको छ।

उनको ठाउँमा माइक्रोसफ्टका वरिष्ठ कार्यकारी अमर सुब्रमण्या आउनेछन्। सुब्रमण्याले १६ वर्ष गुगलमा काम गरिसकेका छन् र हाल जेमिनी असिस्टेन्टको इन्जिनियरिङ नेतृत्व गरिरहेका छन्। बजारको प्रतिस्पर्धा राम्ररी बुझ्ने व्यक्तिलाई भर्ती गर्नु एप्पलका लागि महत्वपूर्ण कदम मानिएको छ।

यो परिवर्तनलाई ठूलो ‘झट्का’ का रूपमा हेरिएको छ। पछाडि फर्केर हेर्दा यो अपरिहार्यजस्तै देखिन्थ्यो। एप्पलको “एप्पल इन्टेलिजेन्स”—कम्पनीको च्याटजीपीटी प्रतिस्पर्धी प्रयास—अक्टोबर २०२४ को लञ्चयता कमजोर प्रदर्शन गरिरहेको छ। समीक्षाहरू “अपेक्षाकृत कमजोर” देखि “चिन्ताजनक” सम्म आएका छन्।

सुरुवाती केही महिना विशेषगरी कठिन रहे। धेरै अलर्टलाई छोटो रूपमा प्रस्तुत गर्नुपर्ने नोटिफिकेशन सारांश सुविधाले २०२४ को अन्त्य र २०२५ को सुरुतिर धेरै हाँस्यास्पद र गलत समाचारहरू उत्पन्न गर्‍यो।

यसबारे बीबीसीले दुई पटक सार्वजनिक रूपमा गुनासो गरेको थियो—पहिलो, एप्पल इन्टेलिजेन्सले लुइजी म्यान्जिओनले आफैँलाई गोली हानेको झूटो रिपोर्ट बनाउँदा र दोस्रो डार्ट्स खेलाडी ल्युम लिटलरले प्रतियोगिता सुरु हुनु अगावै जितेको भन्दै गलत शीर्षक बनाउँदा।

त्यसपछि सिरीको ठूलो पुनर्निर्माण योजना एप्पलका लागि थप समस्याको विषय बन्यो। ब्लूमबर्गले मे महिनामा छापेको अनुसन्धानले एप्पलको एआई संघर्ष गहिरोसँग उजागर गर्‍यो।

रिपोर्ट अनुसार, सफ्टवेयर प्रमुख क्रेग फेडेरिगीले नयाँ सिरी एप्रिल लञ्चको केही हप्ता अगाडि आफ्नै फोनमा परीक्षण गर्दा धेरै प्रचारित सुविधा नै काम नगरेको देखे। लञ्च अनिश्चितकालका लागि रोकियो, जसपछि एआई-सक्षम सिरीको वाचा पाएको आईफोन १६ खरिदकर्ताहरूले एप्पल विरुद्ध सामूहिक मुद्दा दायर गरे।

त्यतिबेला जियानान्ड्रिया लाई सुरु भएकै समयमा साइडलाइन गरिएको थियो। ब्लूमबर्गका अनुसार, टिम कुकले मार्चमा नै सिरीको जिम्मेवारी जियानान्ड्रियाबाट हटाउँदै भिजन प्रो का निर्माता माइक रकवेललाई दिएका थिए। एप्पलले जियानान्ड्रियाको निगरानीमा रहेको रोबोटिक्स विभाग पनि हटाएको थियो।

ब्लूमबर्गको रिपोर्टले संगठनभित्रको अव्यवस्थाको चित्र कोरेको छ जसान एआई र मार्केटिङ टोलीबीच कमजोर समन्वय, बजेट असन्तुलन, नेतृत्वमा ठूलो समस्या र केही कर्मचारीले जियानान्ड्रियाको समूहलाई व्यंग्य गर्दै “एआई/एमलेस” भनेर बोलाउन थालेको उल्लेख छ। धेरै एआई अनुसन्धानकर्ता ओपनएआई, गुगल र मेटामा गएको पनि रिपोर्टमा उल्लेख छ।

एप्पलले अहिले सिरीको आगामी संस्करणमा गुगलको जेमिनी प्रयोग गर्न लागेको बताइएको छ जुन दुई कम्पनीबीच १५ वर्षभन्दा बढी समयदेखि चलिरहेको कडा प्रतिस्पर्धालाई हेर्दा एकदमै असामान्य र सम्भवतः आत्मालोचक कदम मानिएको छ। जियानान्ड्रिया गुगलमा मेशिन इन्टेलिजेन्स र सर्च चलाउने जिम्मेवारीमा थिए।

एप्पलमा उनी एआई रणनीति, मेसिन लर्निङ संरचना र सिरी विकासका प्रमुख थिए। अब ती सबै जिम्मेवारी अमर सुब्रमण्याले सम्हाल्नेछन्। उनी फेडरिगीलाई प्रत्यक्ष रिपोर्ट गर्नेछन्, र एप्पललाई एआई क्षेत्रमा प्रतिस्पर्धी बनाउन महत्वपूर्ण भूमिकामा रहनेछन्।