नानो बनानाका नि:शुल्क प्रयोगकर्ताका लागि तोकिएको प्रयोग सीमामा कडाई गर्दै गुगल

काठमाडौं ।

गुगलको नयाँ ‘नानो बनाना प्रो’ मोडेल प्रयोग गरेर यो लामो बिदामा रमाइला तस्बिर बनाउन चाहनेहरुका लागि एउटा दुखद् समाचार बाहिरिएको छ। कम्पनीले निःशुल्क प्रयोगकर्तामाथि प्रयोगको सीमा कडा पारेको छ।

९टू५गुगलले हेरेको एक समर्थन दस्तावेजअनुसार अहिले निःशुल्क प्रयोगकर्ताले दिनमा दुई वटा मात्र तस्बिर बनाउन सक्ने भएका छन्।  यसअघि दैनिक तीनओटासम्म बनाउन पाइन्थ्यो।

“तस्बिर बनाउने र सम्पादन गर्ने सुविधा उच्च मागमा छ,” गुगलले लेखेको छ। “सीमाहरू पटक–पटक बदलिन सक्छन् र दैनिक रूपमा रिसेट हुनेछ।”

इन्ग्याजेटका अनुसार गुगलले निःशुल्क ‘जेमिनी ३ प्रो’ प्रयोगमा पनि सीमा लगाएको देखिन्छ। दस्तावेजअनुसार निःशुल्क प्रयोगकर्ताले “आधारभूत पहुँच” पाउनेछन् र दैनिक सीमा बदलिन सक्छ।

कम्पनीले नोभेम्बर १८ मा जेमिनी ३ प्रो सार्वजनिक गर्न थालेको बेला निःशुल्क प्रयोगकर्तालाई दिनमा पाँच वटा प्रम्प्ट निःशुल्क दिने ग्यारेन्टी गरेको थियो जुन जेमिनी २.५ प्रो कै बराबर थियो। तर ‘गुगल एआई प्रो’ वा ‘एआई अल्ट्रा’ योजनाका ग्राहकका लागि सीमा बद्लिएको छैन। उनीहरुको दैनिक १०० र ५०० प्रम्प्टको सुविधा यथावत् छ।

लोकप्रिय फिचर आएपछि प्रयोगमा कडाइ गर्ने पहिलो कम्पनी गुगल मात्र होइन। उदाहरणका लागि ओपनएआईले पनि पहिलोपटक च्याटजीपीटीको इन-बिल्ट इमेज जेनेरेटर अत्यधिक लोकप्रिय भएपछि निःशुल्क प्रयोगकर्तासम्म विस्तार गर्न केही समय ढिलाइ गरेको थियो। तर अन्ततः ओपनएआईले तस्बिर बनाउने सुविधा निःशुल्क प्रयोगकर्तामै उपलब्ध गराएको थियो।