युरोपेली एयरोस्पेस समूहद्वारा स्टारलिङ्कलाई टक्कर दिन आफ्ना स्याटेलाइट निर्माण गतिविधिहरूलाई एकताबद्ध गर्ने सम्झौता

काठमाडौं ।

युरोपेली एयरोस्पेस समूहहरूले बिहीबार आफ्ना घाटामा रहेका उपग्रह निर्माण गतिविधिहरूलाई एकताबद्ध गर्ने प्रारम्भिक सम्झौता घोषणा गरेका छन्। महिनौँको वार्तापछि गरिएको यो सहमति इलन मस्कको स्टारलिंक नेतृत्वमा तीव्र गतिमा बढिरहेका प्रतिस्पर्धीहरूलाई सामना गर्न गरिएको टेलिग्राफले जनाएको छ।

एयरबस, थेल्स र लियोनार्डोबीचको लामो प्रतीक्षित सम्झौताअनुसार सन् २०२७ देखि नयाँ संयुक्त कम्पनी सुरु गरिनेछ। यो योजना युरोपेली नियामक निकायहरूको स्वीकृतिमा निर्भर रहनेछ, जसले विगतमा यस्ता संयोजन प्रयासहरूमा प्रतिरोध गरेको थियो।

ती कम्पनीहरूले एक संयुक्त वक्तव्य जारी गर्दै यो नयाँ (नाम नखुलाइएको) संस्थाले युरोपभर २५ हजार जनालाई रोजगारी दिने र सन् २०२४ का तथ्याङ्कअनुसार यसको वार्षिक आम्दानी ६.५ अर्ब युरो (करिब ७.५८ अर्ब अमेरिकी डलर) हुने बताएका छन्।

एयरबसले ३५ प्रतिशत हिस्सा पाउनेछ भने थालेस र लियोनार्डोले समान रूपमा ३२.५ प्रतिशत–३२.५ प्रतिशत स्वामित्व राख्नेछन्। वक्तव्यमा कम्पनी “सन्तुलित प्रशासनिक संरचना” सहित संयुक्त नियन्त्रणमा सञ्चालन हुने उल्लेख गरिएको छ।

कम्पनीहरूको भनाइमा, यो संयोजनले पाँच वर्षभित्रै वार्षिक रूपमा लाखौँ युरोको सञ्चालन–आय उत्पन्न गर्नेछ।

टेलिग्राफका अनुसार “प्रोजेक्ट ब्रोमो” नाम दिइएको वार्ता गत वर्ष सुरु भएको थियो, जसले युरोपेली मिसाइल निर्माता एमबीडीएको सहकार्य मोडेलबाट प्रेरणा लिएको हो। एमबीडीएलाई एयरबस, लियोनार्डो र बीएई सिस्टम्सले संयुक्त रूपमा स्वामित्वमा राखेका छन्।

युरोपका प्रमुख उपग्रह निर्माताहरूले लामो समयदेखि भू–स्थिर कक्षाका जटिल अन्तरिक्ष यानहरू बनाउने प्रतिस्पर्धा गर्दै आएका थिए, तर हाल सस्तो साना उपग्रहहरू पृथ्वी तल्लो कक्षमा प्रक्षेपण हुन थालेपछि उनीहरू प्रभावित भएका छन्।

तीन कम्पनीका प्रमुख कार्यकारी अधिकारीहरूले संयुक्त वक्तव्यमा यो विलयले युरोपेली सरकारहरूलाई “रणनीतिक अन्तरिक्ष क्षेत्रमा युरोपको स्वायत्तता सुनिश्चित गर्न” मद्दत गर्ने उल्लेख गरेका छन्।

सम्झौताअनुसार, थालेस र लियोनार्डोबीचका दुई संयुक्त उपक्रम थालेस एलेना स्पेस र टेलेस्पाजियोका उत्पादन तथा सेवा गतिविधिहरू, एयरबसका केही अन्तरिक्ष र डिजिटल व्यवसायहरू, र थालेस एसईएसओ तथा लियोनार्डोका बाँकी अन्तरिक्ष व्यवसायहरूलाई एकीकृत गरिनेछ।

यी कम्पनीहरूले अहिलेसम्म अन्तरिक्ष क्षेत्रमा करिब ३,००० रोजगारी कटौती गरिसकेका छन्। नयाँ सम्झौतामा थप कटौतीको उल्लेख गरिएको छैन, तर कम्पनीहरूले श्रमिक संघहरूसँग परामर्श गरिने बताएका छन्। रोयटर्सका अनुसार, तीन एयरोस्पेस समूहहरूले यसै साताको सुरुवातमा उपग्रह व्यवसाय एकीकरणको प्रारम्भिक रूपरेखामा सहमति गरेका थिए।

गत गर्मीमा वार्तामा प्रशासनिक संरचना र मूल्याङ्कनका विषयमा समस्या आएपछि यो सम्झौता असफल हुने अवस्था पुगेको थियो, तर स्रोतहरूका अनुसार अन्ततः सहमति टुंगोमा पुगेको हो।