एआईको माग बढेपछि एन्थ्रोपिकले आफ्नो अन्तर्राष्ट्रिय कार्यबललाई तीन गुणा बढाउने

काठमाडौं ।

एन्थ्रोपिकले आफ्नो अन्तर्राष्ट्रिय कार्यबललाई तीन गुणा बढाउने र यस वर्ष आफ्नो अप्लाइड आर्टिफिसियल इन्टेलिजेन्स टोलीलाई पाँच गुणा विस्तार गर्ने शुक्रबार जनाएको छ। कम्पनीका अनुसार यो निर्णय अमेरिकाबाहिर क्लाउड एआई मोडेलप्रतिको तीव्र मागका कारण लिइएको हो।

क्लाउडको करिब ८० प्रतिशत प्रयोग अमेरिका बाहिरबाट हुने गरेको छ। दक्षिण कोरिया, अष्ट्रेलिया र सिंगापुरजस्ता मुलुकमा प्रतिव्यक्ति प्रयोग अमेरिकाभन्दा धेरै उच्च रहेको कम्पनीले जनाएको छ।

रोयटर्सका अनुसार गुगलको मूल कम्पनी अल्फाबेट र अमेजनबाट समर्थन पाएको तथा हाल १८३ अर्ब डलर मूल्यांकन भएको एन्थ्रोपिकले कोडिङमा उत्कृष्ट प्रदर्शन गर्ने एआई मोडेल विकास गरेर छुट्टै पहिचान बनाएको छ।

यसको क्लाउड ठूलो भाषा मोडेल बजारमा उपलब्ध सबैभन्दा शक्तिशाली मोडेलमध्ये एक मानिन्छ। यसले कम्पनीको विश्वव्यापी व्यवसायिक ग्राहक आधारलाई दुई वर्षमै हजारभन्दा कमबाट ३ लाखभन्दा बढीमा पुर्‍याएको छ।

कम्पनीको वार्षिक आम्दानी गत वर्षको सुरुवातमा करिब १ अर्ब डलरबाट बढ्दै अगस्टसम्ममा ५ अर्ब डलरभन्दा बढी पुगेको छ।

अन्तर्राष्ट्रिय मागसँगै कम्पनीले डब्लिन, लन्डन र ज्युरिखमा सयभन्दा बढी नयाँ पदमा कर्मचारी भर्ना गर्नेछ। साथै एशियामा पहिलो कार्यालय टोकियोमा खोल्ने र युरोपमा थप कार्यालय विस्तार गर्ने योजना पनि सार्वजनिक गरेको छ।

यो विश्वव्यापी विस्तारलाई हालै अन्तर्राष्ट्रिय प्रबन्ध निर्देशक बनेका क्रिस सियौरीले नेतृत्व गरिरहेका छन्। यसअघि पॉल स्मिथलाई कम्पनीको मुख्य व्यावसायिक अधिकृत नियुक्त गरिएको थियो।

सियौरीले भने, “क्लाउड को विश्वव्यापी माग असाधारण छ—लन्डनका वित्तीय सेवादेखि टोकियोको उत्पादन क्षेत्रसम्म, संस्थाहरू क्लाउड मा आफ्नो महत्वपूर्ण सञ्चालनलाई सञ्चालन गर्न विश्वास गरिरहेका छन्।”

यसै हप्ताको सुरुवातमा माइक्रोसफ्ट ले एन्थ्रोपिक सँग सम्झौता गरेर क्लाउड मोडेललाई आफ्नो कोपाइलट सहायकमा समावेश गर्ने घोषणा गरेको छ। यो कदमले पहिले प्रायः ओपनएआईमा निर्भर रहेको माइक्रोसफ्ट को जेनेरेटिभ एआई च्याटबोटमा महत्वपूर्ण परिवर्तन ल्याएको छ।