टेरामोस भ्रष्ट्राचार मुद्दामा आरोपित कम्पनी भ्यानराइज सोलुसन र त्यसका सीईओलाई उपस्थित हुन अदालतको सूचना

काठमाडौं ।

टेरामोस बारेको भ्रष्ट्राचार मुद्दामा विशेष अदालतले उक्त सिस्टमको ठेक्का पाएको कम्पनी र त्यसका सीईओलाई अदालतमा हाजिर हुन आउन सूचना जारी गरेको छ।

नेपाल दूरसञ्चार प्राधिकरणले दूरसञ्चार कम्पनीहरुले भ्वाइसमार्फत कर छलेको भन्दै लागू गर्न खोजेको टेरामोस (वा टेरामोक्स) को परामर्शदाताको रुपमा सिस्टम बनाउने ठेक्का पाएको भ्यानराइज सोलुसन एसएएल (अफशोर), त्यसका सीईओ जमाल वाफिक अनौटी तथा त्यसको स्थानीय कम्पनीलाई अदालतले सुनुवाई हुनुभन्दा अगाडि अदालतमा उपस्थित हुन सूचना जारी गरेको हो। अदालतले भदौ २ गते अंग्रेजी भाषामा सार्वजनिक सूचना जारी गर्दै नेपाल दूरसञ्चार प्राधिकरणको सम्पत्तिलाई हानि पुर्याउने बदनियतले टेरामोक्स खरिद गर्दा भ्रष्टाचार गरेको मुद्दाको सम्बन्धमा १५ मे, २०२५ मा अदालतमा आरोपपत्र दायर गरिएको जानकारी गराएको छ।

अख्तियार दुरुपयोग अनुसन्धान आयोगका अनुसन्धान अधिकारीको प्रतिवेदनमा नेपाल सरकार वादी रहेको र कम्पनी सीईओ तथा स्थानीय कम्पनीसमेत लगायत प्रतिवादी रहेको भनिएको छ।

“सोही आधारमा तपाईंको नाममा समनको सूचना जारी गरिएको छ। त्यसैले अब, यात्राको लागि आवश्यक समय बाहेक, ३० दिन भित्र अदालत खुला रहने समयमा तपाईं उपस्थित हुन आवश्यक छ। दिइएको समय सीमा भित्र तपाईँ उपस्थित हुन नसकेको खण्डमा कानून अनुसार मुद्दाको फैसला गरिनेछ,” सूचनामा उल्लेख छ।

विशेष अदालतको सूचनाअनुसार लेबनानी कानून अन्तर्गत ९ औं तल्ला, भ्यानराइज बिल्डिंग, हाजमेह, हाइवे, बेरुत, लेबनानमा मुख्यालय रहेको परामर्शदाता भ्यानराइज सोलुसन एसएएल (अफशोर) सीआरएन १८०१८५७/२००६ का साथै भ्यानराइज सोलुसन एसएएलको काठमाडौँ शाखा कार्यालय (कम्पनी रजिस्ट्रार कार्यालयको दर्ता नम्बर २८१४३०, मिति ७ जनवरी, २०२२ र भ्याट/प्यान दर्ता नम्बर ६१७५५९५०४) मा दर्ता भएको कम्पनीलाई अदालतमा हाजिर हुन भनिएको छ।

यसैगरी जमाल वाफिक एनौटी (लेबनान राहदानी बाहक) को नाममासमेत उस्तै बेहोराको सूचना जारी गरिएको छ।

यसअघि, दूरसञ्चार ट्राफिक अनुगमन तथा ठगी नियन्त्रण प्रणाली टेरामोस (वा टेरामोक्ससमेत भनिने) खरिदका क्रममा भ्रष्टाचार भएको भन्दै नेपाली कांग्रेस सांसद तथा पूर्वमन्त्री मोहनबहादुर बस्नेतसहित १६ जनाविरूद्ध २०८२ जेठ १ गते भ्रष्टाचार मुद्दा दायर गरिएको थियो।

अख्तियार दुरुपयोग अनुसन्धान आयोगले दायर गरेको मुद्दामा नेपाल दूरसञ्चार प्राधिकरणका तत्कालीन अध्यक्ष दिगम्बर झा, दूरसञ्चार प्राधिकरणका तत्कालीन सदस्यहरु धनराज ज्ञवाली र टीका प्रसाद उप्रेती, प्राधिकरणका तत्कालीन अध्यक्ष पुरुषोत्तम खनाल, निर्देशक विजय कुमार राय, उपनिर्देशक रेवती राम पन्थ, उपनिर्देशक सुरेश बस्नेत, उपनिर्देशक हिरण्य प्रसाद वस्ताकोटी र उपनिर्देशक अच्युतानन्द मिश्र, प्राधिकरणका निर्देशक सुरेन्द्रलाल हाडा, निर्देशक दिपेश आचार्य र उपनिर्देशक संदिप अधिकारीका साथै परामर्शदाता भ्यानलाइज सलुसन्स एसएएल (Vanrise Solutions SAL (Offshore) र सोका मुख्य व्यक्ति सीईओ जमाल एनौटी, भ्यानराइज सलुसन्स एसएएलको लोकल एजेन्ट भनिएको कनेक्सन ट्रेड लिंक प्रालि र सोका अध्यक्ष दिलिप कुमार गुरुङ्ग तथा निर्देशक तेज प्रसाद खरेल रहेका छन्।

मन्त्री बस्नेतसहितका १६ जनाविरूद्ध ३ अर्ब २१ करोड ८३ लाख ७७ हजार १८२ रुपैयाँ बिगो तथा सजायको मागसहित अख्तियारले विशेष अदालतमा मुद्दा दायर गरेको हो।

सम्बन्धित समाचार-

टेरामोस प्रकरणमा पूर्वमन्त्री बस्नेतसहित १६ जनाविरुद्ध ३ अर्बमाथि बिगो दावी सहित मुद्दा दायर

यसअघिनै, उक्त मुद्दाका अन्य आरोपीहरु विशेष अदालतमा हाजिर भई धरौटी राखेर साधारण तारिखमा रहेका छन्। उक्त मुद्दाको सुनुवाई शुरु भईसकेको छैन्।

विशेष अदालतले जारी गरेको सूचना-