मस्कको द बोरिङ कम्पनीले नाशभिलमा १६ किलोमिटर लामो टेस्ला सुरुङ निर्माण गर्ने

काठमाडौं ।

अर्बपति ईलन मस्कको सुरुङ खन्ने कम्पनी द बोरिङ कम्पनी र टेनेजी राज्यका गभर्नर बिल लीले संयुक्त रूपमा एक १०-माइल लामो ‘लुप’ निर्माण गर्ने योजना घोषणा गरेका छन्, जसले नासभिलको डाउनटाउन र कन्भेन्सन सेन्टरलाई त्यहाँको विमानस्थलसँग जोड्नेछ।

गभर्नरको प्रेस विज्ञप्तिअनुसार यो परियोजना द बोरिङ कम्पनी र उसका निजी साझेदारहरूले निजी लगानीमा निर्माण गर्नेछन्। तर ती साझेदारहरूको नाम खुलाइएको छैन।

कम्पनी र स्थानीय अधिकारीहरूले अब सम्भावित मार्गहरू मूल्याङ्कन गर्ने, समुदायसँग परामर्श गर्ने र पहिलो चरणको १० माइल लम्बाइको योजनालाई अन्तिम रूप दिने सार्वजनिक प्रक्रिया सुरु गर्नेछन्।

टेकक्रञ्चका अनुसार निर्माण कार्य अनुमतिपत्र प्रक्रिया पूरा नभएसम्म सुरु हुने छैन। तर गभर्नर कार्यालयले यो लुप प्रणालीको पहिलो खण्ड सन् २०२६ को शरद ऋतु भित्र सञ्चालनमा आउन सक्ने बताएको छ।

यदि यो योजना सफल भएमा नासभिल यस्तो प्रणाली सञ्चालनमा ल्याउने दोस्रो सहर बन्नेछ। यसअघि द बोरिङ कम्पनीले लस भेगासमा यस्ता सुरुङहरू निर्माण गरी सञ्चालनमा ल्याइसकेको छ। कम्पनीले लस भेगास कन्भेन्सन सेन्टर वरपर सुरुङ खनेर टेस्ला सवारीका तीन लाख यात्राहरू गराइसकेको दावी गरेको छ।