एफटीसीद्वारा ‘क्लिक टु क्यान्सल’ नियम लागू हुनुअगावै रद्द

काठमाडौं ।

सन् २०२४ मा अमेरिकी संघीय व्यापार आयोग (एफटीसी) ले “क्लिक टु क्यान्सल” नियम कार्यान्वयन गर्ने तयारी गरेको थियो। यस नियमले कम्पनीहरूलाई आफ्ना सदस्यता सेवाका सर्त, अवस्था र रद्द गर्ने विकल्पहरू स्पष्ट रूपमा जनाउन बाध्य बनाउने थियो।

तर त्यही समयदेखि एफटीसी कार्यकारी शाखाको कम स्वतन्त्र अंगजस्तो बनेको छ, र मे महिनामा यस नियमका केही अंशको कार्यान्वयन जुलाई १४ सम्म स्थगित गरिएको थियो।

तर मंगलबार यो पूरा योजना नै धरासायी भएको देखिएको छ। अमेरिकी आठौँ सर्किट अदालतको अपिल विभागका न्यायाधीशहरूले नियमलाई नै खारेज गर्ने निर्णय गरेका छन्।

“क्लिक टु क्यान्सल” नामक यो नियमको औपचारिक नाम “नेगेटिभ अप्सन नियम” थियो। यसविरुद्ध उद्योग संघहरू र व्यवसायिक समूहहरूले अपिल गरेका थिए। उनीहरूले एफटीसीले यो नियम जारी गर्नु अघि उचित प्रक्रिया नअपनाएको र आवश्यक विश्लेषण नगरेको आरोप लगाएका थिए। न्यायाधीशहरूको प्यानलले उनीहरूको तर्कसँग सहमति जनाएको इन्ग्याजेटले उल्लेख गरेको छ।

निर्णयमा भनिएको छ, “नेगेटिभ अप्सन मार्केटिङमा हुने अन्यायपूर्ण र भ्रमपूर्ण अभ्यासको हामी समर्थन गर्दैनौं, तर आयोगको नियम बनाउने प्रक्रियामा देखिएका त्रुटिहरू यहाँ घातक बनेका छन्। आयोगको प्रक्रियागत गल्तीका कारण याचिकाकर्ताहरूले भोगेको क्षति हेर्दा नियम पूरै खारेज गर्नु उचित देखिन्छ।”

न्यायाधीशहरूले यस्ता अभ्यासलाई समर्थन नगरे पनि, अहिलेका लागि व्यवसायहरूले बिना नतिजा यस्तै अभ्यास जारी राख्न पाउने संकेत देखिएको छ।