ग्रोक च्याटबोटले विरोधपछि हटायो हिटलरलाई समर्थन र यहुदीको विरोध गरेको पोस्ट

काठमाडौं ।

अर्बपति इलन मस्कले स्थापना गरेको कम्पनी एक्सएआईद्वारा विकास गरिएको च्याटबोट ग्रोकले मङ्गलबार सामाजिक सञ्जालमा ‘अनुचित’ भनिएका पोस्टहरू हटाएको छ।

यसअघि एक्स प्रयोगकर्ताहरू र यहूदी विरोधी घृणाविरुद्ध काम गर्ने संस्थाहरूले ग्रोकले हिटलरको प्रशंसा गर्ने र यहूदीविरुद्धको विचार प्रवाह गर्ने सामग्रीहरू उत्पादन गरेको भन्दै गुनासो गरेका थिए।

सन् २०२२ मा ओपनएआई को च्याटजीपीटी सार्वजनिक भएपछि एआई च्याटबोटहरूको राजनीतिक पूर्वाग्रह, घृणास्पद भाषण र तथ्यपरकताको विषयमा चिन्ता बढेको रोयटर्सले उल्लेख गरेको छ।

“हामीले ग्रोकद्वारा हालसालै गरिएका पोस्टहरूको जानकारी लिएका छौं र ती अनुचित पोस्टहरू हटाउने सक्रिय प्रयासमा छौं,” ग्रोकले एक्समा पोस्ट गर्दै जनाएको छ।

“सामग्रीबारे जानकारी पाएपछि एक्सएआईले एक्समा पोस्ट गर्नुअघि नै घृणात्मक भाषण रोक्न कदम चालेको छ। एक्सएआई सत्य खोज्ने प्रयासमा मात्रै तालिम दिइरहेको छ र एक्सका लाखौं प्रयोगकर्ताको सहयोगले हामी मोडेलमा सुधार गर्नुपर्ने ठाउँहरू चाँडै पत्ता लगाउन सफल भएका छौं,” पोस्टमा भनिएको छ।

यहूदीविरोधी गतिविधि रोक्न स्थापना गरिएको गैर-नाफामूलक संस्था एडीएलले ग्रोक र यस्तै अन्य ठूलो भाषा मोडेलहरूलाई यहूदीविरोधी वा उग्रवादी घृणामा आधारित सामग्री उत्पादन नगर्न आग्रह गरेको छ।

“हाल ग्रोक एलएलएमबाट देखिएको व्यवहार गैरजिम्मेवार, खतरनाक र यहूदीविरोधी छ, यसलाई सामान्य रूपमा लिन सकिँदैन। यस्तो उग्रवादी भाषालाई बल दिनुले एक्सलगायत धेरै प्लेटफर्महरूमा बढ्दै गएको यहूदीविरोधी प्रवृत्तिलाई झनै उक्साउनेछ,”एडीएलले एक्समा भनेको छ।

गत मे महिनामा, केही प्रयोगकर्ताले ग्रोकले दक्षिण अफ्रिकासम्बन्धी सामान्य कुराकानीको क्रममा ‘गोरा जातिको जातीय संहार’ को विषय उठाएको देखेपछि एक्सएआईले यो उत्तरको कारण ग्रोकको सफ्टवेयरमा गरिएको एउटा अनधिकृत परिवर्तन भएको स्पष्ट पारेको थियो।

गत महिनामात्र मस्कले ग्रोकमा सुधार ल्याउने वाचा गर्दै भनेका थिए, “कुनै पनि फाउन्डेशन मोडेल जुन असंशोधित डेटा प्रयोग गरेर बनाइएको छ, त्यहाँ अत्यधिक फोहोर सामग्री हुन्छ।”

मङ्गलबार, ग्रोकले हिटलरलाई “गोरा जातिविरुद्धको घृणाविरुद्ध लड्न सक्षम व्यक्ति” भन्दै, “हिटलर प्याटर्न पत्ता लगाएर त्यसलाई निर्णायक रूपमा सम्बोधन गर्ने” मानिस भएको सुझाव दिएको थियो।

यसबाहेक उसले हिटलरलाई “इतिहासको जुङ्गे मानिस” भन्दै सकारात्मक ढंगमा उल्लेख गरेको थियो र केही यहूदी थर भएका व्यक्तिहरूलाई गोरा जातिविरुद्धको उग्र गतिविधिका लागि जिम्मेवार ठहर गरेको थियो। यस्ता पोस्टहरू व्यापक रूपमा आलोचित भएका छन्।