एनभिडिया जून महिनामा मूल्यवान कम्पनीको शीर्ष स्थानमा फर्कियो

काठमाडौं ।

एनभिडियाले जुन महिनामा विश्वव्यापी रूपमा सबैभन्दा मूल्यवान कम्पनीहरू मध्ये शीर्ष स्थान पुनः प्राप्त गरेको छ। एनभिडियाको आर्टिफिशियल इन्टेलिजेन्सतर्फको नेतृत्वमा नयाँ आशा र यसको एआई चिप्सको बढ्दो मागको अपेक्षाले कम्पनीको शेयरलाई सहयोग गरेको छ।

जुन महिनाको अन्त्यमा चिप निर्माताको बजार मूल्य ३.८६ ट्रिलियन अमेरिकी डलर पुगेको र यो माइक्रोसफ्ट कर्पको ३.६९ ट्रिलियन अमेरिकी डलर मूल्याङ्कन भन्दा लगभग ४.३ प्रतिशतले बढी भएको बताइएको छ।

यद्यपि, एनभिडियाको बजार मूल्यले अझै पनि सन् २०२४ को डिसेम्बरमा एप्पल इंकले स्थापित गरेको लगभग ३.९२ ट्रिलियन अमेरिकी डलरको उच्चतम रेकर्डलाई पार गर्न सकेको छैन्। ३.१ ट्रिलियन अमेरिकी डलरको बजार पूँजीकरणको साथ एप्पल गत महिनाको अन्त्यमा सबैभन्दा मूल्यवान कम्पनीको रूपमा तेस्रो स्थानमा रहेको उल्लेख छ।

मेटा प्लेटफर्म इंक, ब्रोडकम इंक र अमेजन डट कम इंकले गत महिना आफ्नो बजार मूल्य क्रमशः १४ प्रतिशत, १३.९ प्रतिशत र ७ प्रतिशतले बढेको देखेका छन् जुन १.८६ ट्रिलियन अमेरिकी डलर, १.३ ट्रिलियन अमेरिकी डलर र २.३३ ट्रिलियन अमेरिकी डलरमा पुगेको छ।

गत महिना टेस्ला इंकको बजार मूल्य ८.३ प्रतिशतले घटेर १.०२ ट्रिलियन डलरमा झरेको छ जसमा सीईओ इलन मस्कको अमेरिकी राष्ट्रपति डोनाल्ड ट्रम्पसँगको विवादले असर पारेको रोयटर्सले रिपोर्ट गरेको छ।