काठमाडौं ।
“डिफल्ट एआई मोडेल” को प्रशिक्षणका लागि आफ्नो सामग्री प्रयोग गरेको आरोप लगाउँदै बीबीसीले अमेरिकी एआई स्टार्टअप पर्प्लेक्सिटीविरुद्ध कानुनी कारबाहीको चेतावनी दिएको छ।
बीबीसीले पर्प्लेक्सिटीलाई सामग्री स्क्र्यापिङ रोक्न, आफ्नो एआई प्रणाली प्रशिक्षित गर्न प्रयोग गरिएका बीबीसी सामग्री मेट्न, र “बौद्धिक सम्पत्तिको दुरुपयोगबापत क्षतिपूर्तिको प्रस्ताव” पेश गर्न माग गर्दै कम्पनीका प्रमुख कार्यकारी अधिकृत अरविन्द श्रीनिवासलाई पत्र पठाएको उल्लेख गरिएको छ।
फाइनान्सियल टाइम्सको रिपोर्टको पुष्टि गर्दै बीबीसीले रोयटर्सलाई वक्तव्य दिएको छ।
पर्प्लेक्सिटीले यसअघि पनि फोर्ब्स र वायरड जस्ता मिडिया संस्थाहरूबाट सामग्री चोरी गरेको आरोप खेपेको थियो। यद्यपि कम्पनीले प्रकाशकहरूको चासो सम्बोधन गर्न आम्दानी बाँडफाँट कार्यक्रम सुरु गरिसकेको छ।
गत अक्टोबरमा, न्युयोर्क टाइम्सले कम्पनीलाई “सीज एन्ड डेसिस्ट” नोटिस पठाउँदै आफ्ना सामग्रीहरू जेनेरेटिभ एआई प्रयोजनका लागि प्रयोग नगर्न चेतावनी दिएको थियो।
च्याटजीपीटीको सुरुवातदेखि नै, इन्टरनेटबाट सामग्री संकलन गरी प्रयोगकर्तालाई संक्षेपमा जानकारी दिने च्याटबटहरूप्रति प्रकाशकहरूले चिन्ता व्यक्त गर्दै आएका छन्।
बीबीसीले पर्प्लेक्सिटीले आफ्नो सामग्री पुरै नक्कल गरेको र खोज परिणामहरूमा बीबीसीको वेबसाइटको लिङ्क देखिएको जनाएको छ।
पर्प्लेक्सिटीले बीबीसीका दाबीलाई “चतुर तर अवसरवादी” भनेको छ र बीबीसीलाई “प्रविधि, इन्टरनेट र बौद्धिक सम्पत्ति कानुनको आधारभूत बुझाइ नहुने” आरोप लगाएको छ।
पर्प्लेक्सिटीले च्याटजीपीटी र गुगलको जेमिनी जस्तै इन्टरनेट खोजमार्फत जानकारी दिने सेवा उपलब्ध गराउँछ। यो स्टार्टअप अमेजनका संस्थापक जेफ बेजोस, एआई कम्पनी एनभिडिया, र जापानको सफ्टबैंक समूहबाट लगानी प्राप्त गर्दै आएको छ।
पछिल्लो महिना वाल स्ट्रिट जर्नलले जनाएको अनुसार, कम्पनी १४ अर्ब डलर मूल्यांकनसहित ५० करोड डलर लगानी जुटाउने अन्तिम चरणको छलफलमा रहेको छ।
प्रकाशित: ८ असार २०८२, आईतवार
