Technology Khabar १५ जेष्ठ २०८२, बिहीबार
काठमाडौं ।
आर्थिक वर्ष २०८१/८२ मा नेपाल दूरसञ्चार कम्पनी लिमिटेडको कुल सञ्चालन आय ४३.९३ प्रतिशतले बढ्ने अनुमान गरिएको छ।
अर्थमन्त्री विष्णुप्रसाद पौडेलले आज प्रतिनिधिसभामा आर्थिक वर्ष २०८२/८३ आर्थिक सर्वेक्षण पेस गर्दै उक्त जानकारी दिएका हुन्। २०८२/८३ को आर्थिक सर्वेक्षण पेस गर्ने क्रममा चालु आर्थिक वर्ष २०८१/८२ को समीक्षा तथा अघिल्ला आर्थिक वर्षको आँकडासँगको तुलना पनि प्रस्तुत गरिएको थियो।
समीक्षा अनुसार नेपाल दूरसञ्चार कम्पनी लिमिटेडका नामले चिनिने नेपाल टेलिकमले चालु आर्थिक वर्ष २०८१/८२ सकिँदासम्म कुल सञ्चालन आयमा ४३.९३ प्रतिशतले वृद्धि गर्ने संशोधित अनुमान गरिएको छ।
आर्थिक वर्ष सकिन र अन्तिम लेखापरीक्षण बाँकी भएका कारण विभिन्न सूचक तथा अघिल्ला वर्षका आँकडाहरुको तुलनामा कुल सञ्चालन आयको यो संशोधित अनुमान गरिएको हो।
अघिल्लो आर्थिक वर्ष २०७९/८० मा कम्पनीको कुल सञ्चालन आय ३६ अर्ब २७ करोड १४ लाख रुपैयाँ रहेको थियो भने गत आर्थिक वर्ष २०८०/८१ मा आइपुग्दा यो रकम १ अर्ब ७१ करोड ११ लाख अर्थात ४.७२ प्रतिशतले घटेर ३४ अर्ब ५६ करोड ३ लाखमा सीमित हुन पुगेको थियो।
तर चालु आर्थिक वर्षमा भने कम्पनीको कुल सञ्चालन आय गत आर्थिक वर्ष २०८०/८१ को तुलनामा १५ अर्ब १८ करोड २० लाख रुपैयाँ अर्थात् उल्लेखनीय ४३.९३ प्रतिशतको वृद्धिसहित समग्रमा ४९ अर्ब ७४ करोड २३ लाख रुपैयाँ पुग्ने अनुमान गरिएको छ।
प्रकाशित: १५ जेष्ठ २०८२, बिहीबार
