क्लाउड च्याटबोट एपहरूका लागि “भ्वाइस मोड” सार्वजनिक गर्दै एन्थ्रोपिक

काठमाडौं ।

एन्थ्रोपिकले आफ्नो क्लाउड च्याटबोट एपहरूका लागि “भ्वाइस मोड” सार्वजनिक गर्न थालेको छ।

हाल बीटा संस्करणमा उपलब्ध यो भ्वाइस मोडले क्लाउड मोबाइल एप प्रयोगकर्ताहरूलाई क्लाउड सँग “पूरा बोलेर संवाद गर्न” सक्ने बनाउँछ, र यो सुविधा आगामी केही हप्ताभित्र अंग्रेजीमा उपलब्ध हुने एन्थ्रोपिक को आधिकारिक X खाताले र कम्पनीको वेबसाइटमा अद्यावधिक गरिएका दस्तावेजले जानकारी दिएका छन्।

कम्तीमा एक प्रयोगकर्ताले मंगलबार अबेर भ्वाइस मोडको पहुँच पाएको एक्स मा उल्लेख गरेका छन्। डिफल्ट रूपमा यो सुविधा एन्थ्रोपिक को क्लाउड सनेट ४ मोडलद्वारा सञ्चालित छ।

“भ्वाइस मोड … तपाईंलाई क्लाउडसँग बोल्न र आवाजमा प्रतिक्रिया सुन्ने सुविधा दिन्छ, जसले तपाईंको हात व्यस्त भए पनि मन खाली भएको बेला क्लाउड प्रयोग गर्न सजिलो बनाउँछ,” कम्पनीको सपोर्ट पेजमा उल्लेख छ। “क्लाउड बोल्दा मुख्य बुँदाहरू स्क्रिनमा देखाउने, बोल्दै क्लाउड सँग संवाद गर्न सक्ने, र क्लाउडको आवाजमा प्रतिक्रिया सुन्ने क्षमता यो मोडले दिन्छ।”

टेकक्रञ्चका अनुसार ओपनएआई, गुगल र एक्सएआईजस्ता थुप्रै एआई कम्पनीहरूले आफ्ना च्याटबोटहरूको लागि भ्वाइस च्याट अनुभव उपलब्ध गराइसकेका छन्।

उदाहरणका लागि गुगलसँग जेमिनी लाइभ छ भने एक्सएआईसँग ग्रोकको लागि भ्वाइस मोड छ। यी सबैमा प्रयोगकर्ताले टाइप नगरी बोल्दै संवाद गर्न सक्छन्, जसले कुराकानीलाई अझ सहज र स्वाभाविक बनाउँछ।

एन्थ्रोपिकको भ्वाइस मोडले प्रयोगकर्तालाई कागजात, तस्बिरहरूबारे कुराकानी गर्न, पाँचवटा फरक आवाजहरूबाट छनोट गर्न, बोल्दाबोल्दै टेक्स्ट र भ्वाइस मोडबीच स्विच गर्न, र संवादपछि ट्रान्सक्रिप्ट तथा संक्षेप हेर्न सक्ने सुविधा दिन्छ।

तर यसको केही सीमाहरू छन्। भ्वाइस कुराकानीहरू नियमित प्रयोग सीमाभित्रै पर्छन् — एन्थ्रोपिकका अनुसार, निःशुल्क प्रयोगकर्ताहरूले २०–३० कुराकानी गर्न सक्ने अपेक्षा गर्न सक्छन्। साथै, केवल सशुल्क क्लाउड सदस्यहरूले मात्र गुगल वर्कस्पेस कनेक्सन प्रयोग गर्न सक्छन्, जसले क्लाउडलाई गुगल क्यालेण्डर र जीमेल इमेलहरूमा पहुँच दिने टेकक्रञ्चले उल्लेख गरेको छ। गुगल डक्स इन्टिग्रेसन भने क्लाउड इन्टरप्राइज योजना अन्तर्गत मात्र उपलब्ध छ।

क्लाउडका प्रमुख उत्पादन अधिकृत सीपीओ माइक क्रिगरले मार्चको सुरुतिर फाइनान्सियल टाइम्ससँगको अन्तर्वार्तामा क्लाउडका लागि भ्वाइस क्षमता तयार गरिरहेको पुष्टि गरेका थिए।

उक्त रिपोर्ट अनुसार, एन्थ्रोपिकले आफ्नो प्रमुख लगानीकर्ता तथा साझेदार अमेजन र भ्वाइसमा केन्द्रित स्टार्टअप इलेभनल्याब्ससँग भावी भ्वाइस फिचर विकासका लागि छलफल गरिरहेको थियो।

यी साझेदारीहरू मध्ये कुन कार्यान्वयनमा आएको हो भन्ने कुरा भने अझै स्पष्ट छैन।