चिनियाँ वैज्ञानिकहरूले तियाङगोङ अन्तरिक्ष स्टेशनमा रहस्यमय ब्याक्टेरिया फेला पारे

काठमाडौं ।

चिनियाँ वैज्ञानिकहरूले तियाङगोङ अन्तरिक्ष स्टेशनमा ब्याक्टेरियाको नयाँ प्रजाति पत्ता लगाएका छन्। इन्टरनेशनल जर्नल अफ सिस्टेम्याटिक एण्ड इभोलुसनरी माइक्रोबायोलोजीमा प्रकाशित एक पेपरका अनुसार, आधिकारिक रूपमा नियालिया तियाङगोजेन्सिस नाम दिइएको नयाँ माइक्रोब स्ट्रेन, सन् २०२३ को जुन महिनामा पृथ्वीमा फर्किएको शेन्झोउ १५ क्रुड मिसनको क्रममा तियाङगोङको सतहबाट सङ्कलन गरिएका माइक्रोबायल स्याम्पल (नमूनाहरू) मा फेला परेको थियो। नयाँ माइक्रोबलाई एरोबिक, स्पोर–फर्मिङ्ग र रड–सेप्ड (आकार)को ब्याक्टेरियमको रूपमा वर्णन गरिएको छ। तल्लो पृथ्वीको कक्षमा रहेको थ्री–मोड्युल अन्तरिक्ष स्टेशन तियाङगोङमा नयाँ प्रजाति पत्ता लागेको यो पहिलो पटक हो।

उक्त पेपरका अनुसार, यो नोभल स्ट्रेन पृथ्वीमा पाइने नियालिया सर्कुलन्ससँग मिल्दोजुल्दो भएको तर यो अन्तरिक्षमा भएको हुनाले जीवनको अध्ययनमा लाभदायक साबित हुन सक्ने धेरै म्युटेसनहरू पनि प्रदर्शन गरेको उल्लेख गरिएको छ। “अन्तरिक्ष यात्रीहरूको स्वास्थ्यको सुरक्षा र अन्तरिक्ष यानको कार्यक्षमता कायम राख्न दीर्घकालीन अन्तरिक्ष अभियानहरूमा माइक्रोबको विशेषताहरू बुझ्नु आवश्यक छ” उक्त पेपरमा बताइएको साइन्स अलर्टले उल्लेख गरेको छ।

वैज्ञानिकहरूले नयाँ ब्याक्टेरियामा जिलेटिन हाइड्रोलाइज (ब्रेक डाउन) गर्ने “अद्वितीय क्षमता” रहेको बताएका छन्, जुन सीमित पोषक तत्वहरू भएको वातावरणमा उपयोगी हुन सक्ने उल्लेख गरिएको छ।

नयाँ स्ट्रेनले दुई प्रमुख प्रोटीनहरूमा “संरचनात्मक र कार्यात्मक” भिन्नताहरू पनि देखाएको जनाइएको छ जसले बायोफिल्म फर्मेसन, अक्सिडेटिभ स्ट्रेस रेसपोन्स र रेडियसन ड्यामेजलाई “इनह्यान्स” (बढाउन) गर्न सक्ने उक्त पेपरले उल्लेख गरेको छ।

यी अडापटेसनहरूले माइक्रोबले अन्तरिक्ष वातावरणको चरम सीमामा बाँच्न मद्दत गर्ने संयन्त्रहरू विकास गरेको देखाउँछ भनि अनुसन्धानले थप उल्लेख गरेको छ।

नयाँ ब्याक्टेरियाले तियाङगोङका अन्तरिक्ष यात्रीहरूको स्वास्थ्यमा कुनै खतरा निम्त्याउँछ कि निम्त्याउँदैन भनेर अझै निर्धारण नगरिएको बताइएको छ।

विशेष गरी, अन्तरिक्षमा नयाँ प्रजाति पत्ता लागेको यो पहिलो पटक नभएको बताइएको छ। स्पेस डट कमका अनुसार, इन्टरनेशनल स्पेस स्टेशनबाट पहिले नै धेरै नयाँ ब्याक्टेरियाहरू पहिचान गरिएका छन्, जसमा अन्तरिक्ष यात्रीहरूलाई मंगल ग्रहमा बाली उब्जाउन मद्दत गर्ने ब्याक्टेरियाका प्रजातिहरू पनि समावेश छन्।

त्यसैगरी यस अघि हालै मात्र, मानवताले निर्माण गरेको सबैभन्दा बाँझो ठाउँहरू मध्ये एक नासाको क्लिन रुम्स (सफा कोठाहरू) मा अज्ञात २६ ब्याक्टेरिया प्रजातिहरू पत्ता लागेको एनडीटिभीले रिपोर्ट गरेको छ।