Technology Khabar २८ बैशाख २०८२, आईतवार
काठमाडौं ।
गुगलले प्रयोगकर्ताको डाटा गोपनीयता उल्लंघन गरेको आरोपमा टेक्सास राज्यसँग समझदारीस्वरूप १.३७५ अर्ब डलर तिर्न सहमति जनाएको टेक्सासका महान्यायाधिवक्ता केन प्याक्सटनले शुक्रबार बताएका छन्।
यो समझदारीले टेक्सास उपभोक्ता संरक्षण कानुन उल्लंघन गरेको आरोपमा तीनवटा उत्पादनसँग सम्बन्धित दुई मुद्दालाई टुंग्याएको हो। समझदारीको विस्तृत विवरण सार्वजनिक गरिएको छैन।
रोयटर्सका अनुसार टेक्सास महान्यायाधिवक्ताले यो रकम कसरी खर्च गरिने भन्ने कुरा खुलाएका छैनन्।
गुगलले यो समझदारीले इन्कग्निटो, लोकेसन हिस्ट्री र बायोमेट्रिक्ससँग सम्बन्धित दावीहरू समेट्ने जानकारी दिएको छ। कम्पनीले कुनै गल्ती स्वीकार गरेको छैन।
“यो समझदारीले पहिले नै अन्य स्थानमा समाधान भइसकेका, र हामीले पहिले नै परिमार्जन गरिसकेका उत्पादन नीतिसँग सम्बन्धित पुराना दावीहरूलाई टुंग्याउँछ,” गुगलका प्रवक्ता जोसे कास्टानेडाले भने, “हामी यी विषयहरू टुंग्याउन पाउँदा खुसी छौं र हामी हाम्रा सेवाहरूमा बलियो गोपनीयता नियन्त्रण बनाउँदै लैजानेछौं।”
प्याक्सटनले सन् २०२२ मा गुगलमाथि दुईपटक मुद्दा दायर गरेका थिए, जसमा टेक्सासका बासिन्दाहरूको अनुहारको बनोट र आवाजको छाप उचित सहमति बिना संकलन गरिएको आरोप लगाइएको थियो। साथै, प्रयोगकर्ताले लोकेसन ट्र्याकिङ बन्द गरेको ठाने पनि गुगलले उनीहरूको स्थान ट्र्याक गरेको र इनकग्निटो मोडप्रति प्रयोगकर्तालाई भ्रममा पारेको आरोप पनि लगाइएको थियो।
गुगलका प्रवक्ताका अनुसार समझदारीले कुनै पनि उत्पादनमा परिमार्जन गर्नुपर्ने आवश्यकता पर्दैन। फेसबुक र इन्स्टाग्रामको मालिक मेटा प्लेटफर्म्सले गत वर्ष अनुहार पहिचानसम्बन्धी डेटा अवैध रूपमा संकलन र प्रयोग गरेको आरोपमा प्याक्सटनसँग १.४ अर्ब डलर तिर्न सहमति जनाएको रोयटर्सले जनाएको छ।
प्रकाशित: २८ बैशाख २०८२, आईतवार
