काठमाडौं ।
एआई डेभलपरहरूका लागि लोकप्रिय प्लेटफर्म प्रदान गर्ने स्टार्टअप हगिङ फेसले हालै एउटा नयाँ प्रोग्राम गर्न मिल्ने, ३डी-प्रिन्ट गर्न सकिने रोबोटिक हात बिक्रीमा ल्याएको छ, जसले सामान टिप्ने, सार्ने जस्ता केही आधारभूत कामहरू गर्न सक्छ।
एसओ-१०१ नामको यो हात हगिङ फेसको अघिल्लो मोडल एसओ-१०० को पछिल्लो संस्करण हो, जुन गत वर्ष सार्वजनिक गरिएको थियो। कम्पनीको रोबोटिक्स शाखा लेरोबोटले फ्रान्सेली रोबोटिक्स कम्पनी द रोबोट स्टुडियोसँग मिलेर एसओ-१०० लाई करिब १०० डलर मूल्यमा गत वर्षको अक्टोबरमा सार्वजनिक गरेको थियो।
एसओ-१०१ को विकासका लागि हगिङ फेसले फेरि द रोबोट स्टुडियोसँग सहकार्य गरेको छ, साथै यो प्रयासमा वाउरोबो, सीड स्टुडियो (आईओटी हार्डवेयर आपूर्तिकर्ता) र पार्टाबोट (रोबोट पार्ट बिक्रेता) पनि सहभागी छन्।
टेकक्रञ्चका अनुसार एसओ-१०० को तुलनामा, एसओ-१०१ छिटो एसेम्बल गर्न मिल्ने बनाइएको छ, साथै यसमा सुधारिएको मोटर जडान गरिएको छ, जसले घर्षण कम गर्छ र हातले आफ्नै वजन धान्न सक्ने बनाउँछ।
क्यामेरा जडित यो हातलाई रिइन्फोर्समेन्ट लर्निङ भनिने एआई प्रविधिबाट तालिम दिन सकिन्छ, जसले गर्दा यसले लेगो ब्लक टिपेर बिनमा राख्ने जस्ता काम “सिक्न” सक्छ।
ध्यान दिनुपर्ने कुरा के हो भने, १०० डलर एसओ-१०१ को आधार मूल्य हो। यदि पूर्णरूपमा एसेम्बल गरिएको मोडल किन्ने हो भने, त्यसमा थप शुल्क लाग्छ। साथै, चिनियाँ आयातमा लाग्ने अमेरिकी भन्सार शुल्कका कारण मूल्य आपूर्तिकर्ताको आधारमा १०० देखि करिब ५०० डलरसम्म हुन सक्छ।
हगिङ फेसले आफ्नो रोबोटिक्स प्रयासलाई तीव्र रुपमा विस्तार गरिरहेको छ। यसै सन्दर्भमा, कम्पनीले हालै फ्रान्समा आधारित रोबोटिक्स स्टार्टअप पोलेन रोबोटिक्सलाई खरिद गरेको छ। पूर्व टेस्ला अप्टिमस इञ्जिनियर रेमी क्याडेनीको नेतृत्वमा हगिङ फेसको रोबोटिक्स शाखाले अब पोलेनको रीची २ नामको ह्युमनोइड अर्थात् मानव स्वरुपको रोबोट बिक्री गर्ने योजना बनाएको छ, र विकासकर्ताहरूलाई यसको कोड डाउनलोड गर्न तथा सुधार सुझाव दिन खुला गर्नेछ।
प्रकाशित: १७ बैशाख २०८२, बुधबार
