अवैधरुपमा सीमाक्षेत्रमा राखिएका भारतीय टेलिकम कम्पनीहरुको सिग्नल बुस्टर जफत

काठमाडौं ।

वीरगञ्जमा प्रहरीले भारतीय मोबाइल सेवा प्रदायकहरुको मोबाइल सिग्नल बुस्ट गर्ने (मोबाइल सिग्नल) बुस्टरहरु जफत गरेको छ। जिल्ला प्रहरी कार्यलय पर्साले नेपाल दूरसञ्चार प्राधिकरणमार्फत पाएको जानकारी र मोबाइल सेवा प्रदायक कम्पनी एनसेलबाट पाएको सहयोगमा चारओटा मोबाइल सिग्नल बुस्टरहरु जफत गरेको बताइएको छ।

यी अबैध रेडियो फ्रिक्वेन्सी सिग्नल (मोबाइल सिग्नल) बुस्टरहरुले स्वदेशी मोबाइल सेवा प्रदायक कम्पनीहरुको नेटवर्क गुणस्तरमा बाधा पुर्याउने, आम्दानी तथा सरकारको राजश्वमा हानी पुर्याउने गरेको पाइएको छ।

प्रहरीका अनुसार यस्ता बुस्टरहरुको प्रयोगले फ्रिक्वेन्सी इन्टरफेरेन्स भई नेपाली मोबाइल सेवा प्रदायकहरुको भ्वाइस सेवाको गुणस्तर खराब हुनुका साथै डाटाको गति कम भएको साथै स्थानीय सेवा प्रदायकको आम्दानीमा असर परिरहेको थियो। यसबाट सरकारले संकलन गर्ने राजश्वमा समेत चुहावट भइरहेको थियो।

दूरसञ्चार प्राधिकरणले अनुगमनका क्रममा सीमावर्ती क्षेत्रहरुमा विदेशी दूरसञ्चार सेवा प्रदायकहरुको सेवा प्रयोग गर्न मोबाइल सिग्नल बुस्टर तथा एमप्लिफायरको प्रयोग भइरहेको पत्ता लगाएर खबर गरेपछि पर्सा प्रहरीले यी बुस्टरहरु नियन्त्रणमा लिएको हो।

सीमावर्ती क्षेत्रमा भारतीय सेवा प्रदायकका सिम सजिलै पाइने भए पनि सिग्नलका लागि पूर्वाधार नभएका कारण यस प्रकारको बुस्टरहरु प्रयोग गरी भारतीय मोबाइल सेवा प्रदायक एयरटेल र जियो जस्ता कम्पनीका सिग्नलको क्षमता बढाउने काम हुँदै आएकोले जिल्ला प्रहरी कार्यालय पर्साले जफत गरेको हो।

यसप्रकारका उपकरणहरु राख्नका लागि सम्बन्धित देशको नियम कानुन अनुसार अनुमति लिनुपर्ने हुन्छ। नेपालमा पनि यसका लागि रेडियो ऐन, २०१४ तथा दूसञ्चार ऐन, २०५३ मा अनुमति लिनुपर्ने प्रावधान राखिएको छ। अनुमति नलिई चलाउनु गैरकानुनी हो।

यसै प्रकारका हर्कतहरु देखिन थालेका कारण गत चैत दोस्रो साता नियामक निकाय नेपाल दूरसञ्चार प्राधिकरणले मोबाइल सिग्नल बुस्टर तथा एमप्लिफायरको अवैध प्रयोग गर्नेलाई कारबाही गर्ने चेतावनीसहितको सूचना निकालेको थियो।

प्राधिकरणले सूचनामा “नेपालका केही स्थानहरु (सीमावर्ती क्षेत्रहरुमा समेत) विदेशी दूरसञ्चार सेवा प्रदायकहरुको सेवा प्रयोग गर्न सिग्नल स्ट्रेन्थ बढाउने गरी मोबाइल सिग्नल बुस्टर तथा एमप्लिफायरको प्रयोग भइरहेको भन्ने बुझिन आएको” अवगत गराउँदै यस्तो कार्य रेडियो ऐन, २०१४ को दफा ३ तथा दूसञ्चार ऐन, २०५३ को दफा २१ को प्रावधान विपरितको कार्य भएकोले यस्तो कार्य नगर्न/नगराउन सम्बन्धित सबैलाई सचेत गराएको थियो।

सम्बन्धित समाचार

मोबाइल सिग्नल बुस्टर तथा एमप्लिफायरको अवैध प्रयोग गर्नेलाई कारबाही गर्ने नियामकको चेतावनी

पर्सा जिल्लाका सीमावर्ती क्षेत्रहरुमा अझै यस प्रकारका थुप्रै बुस्टरहरु अबैध रुपमा प्रयोगमा रहेको आकलन गरिए पनि प्रहरीले हाल ४ ‌ओटा मात्र जफत गर्न सकेको हो। बाँकी उपकरणहरुले अझै पनि भारतीय सेवा प्रदायकका सिग्नल राम्रो बनाई स्वदेशी सेवा प्रदायक, कानून, समग्र अर्थतन्त्र तथा सुरक्षा संयन्त्रमाथि नै धावा बोलिरहेको प्रतित हुन्छ।