विद्यार्थीलाई निःशुल्क कम्प्युटर तालिम

काठमाडौं ।

एसइई दिएर बसेका विद्यार्थीलाई निःशुल्क कम्प्युटर तालिम र ब्रिजकोर्स गराउन थालिएको छ। सुनसरीको वराहक्षेत्र–१० नं वडा कार्यालयले एक सयभन्दा बढी विद्यार्थीलाई तालिम दिन थालेको हो।

उच्च माध्यमिक शिक्षा पढ्नका लागि वडा क्षेत्रभित्र रहेका विद्यार्थीलाई आवश्यक पर्ने कम्प्युटर र ब्रिजकोर्स तालिम दिन थालिएको वडा नम्बर १० का वडाध्यक्ष तेजबहादुर गुरुङले बताए।

श्रीप्रकाश माध्यमिक विद्यालयमा कम्प्युटर र ब्रिजकोर्स तालिम गराउँदै आइएको छ । पहिलो पटक एसइई दिएर बसेका विद्यार्थीलाई गाउँमै वडा कार्यालयले ब्रिजकोर्सको कक्षा र कम्प्युटर तालिम दिन थालेको बताइएको छ।

विद्यार्थीको क्षमता अभिवृद्धि गर्ने र समयानुकूल सिपमूलक कम्प्युटर ज्ञान प्रदान गर्न वडाले तीनमहिने कम्प्युटर तालिमका साथै ब्रिजकोर्सको कक्षा सुरु गरेको वडाध्यक्ष गुरुङले बताए। उनले भने, “एक सामुदायिक र तीन निजी विद्यालयबाट एसइई दिएर बसेका विद्यार्थीलाई कम्प्युटर तालिममा सहभागी गराइएको छ।”

प्रकाश माध्यमिक विद्यालयसहित वडा क्षेत्रभित्र रहेका तीनओटा निजी विद्यालयबाट एसइई दिएका विद्यार्थी कम्प्युटर र ब्रिजकोर्सको कक्षामा सहभागी हुँदै आएका छन्।

वडा क्षेत्रका विद्यार्थीलाई प्राविधिक क्षेत्रमा दक्ष बनाउँदै उनीहरूको क्षमता विकासमा तालिमले सहयोग पुर्याउने स्थानीय अभिभावक तथा शिक्षक देवीबहादुर कटुवाल बताउँछन्।

एसइईपछिको नतिजा नआउन्जेलसम्मको खाली समयलाई सदुपयोग गरी विद्यार्थीको क्षमता अभिवृद्धि गर्न तालिमले सहयोग पुग्ने बताइएको छ। आजको गोरखापत्रबाट