बोस्टनमा क्वान्टम कम्प्युटिङ अनुसन्धान केन्द्र खोल्दै एनभिडिया

काठमाडौं ।

एनभिडियाले बोस्टनमा नयाँ क्वान्टम कम्प्युटिङ अनुसन्धान केन्द्र खोल्ने भएको छ, जहाँ उसले हार्भर्ड विश्वविद्यालय र मासाचुसेट्स इन्स्टिच्युट अफ टेक्नोलोजी (एमआईटी) का वैज्ञानिकहरूसँग सहकार्य गर्ने योजना बनाएको छ।

यो घोषणा एनभिडियाका सीईओ जेन्सेन हुआङले बिहीबार गरेका हुन्।
हुआङले यो घोषणा क्यालिफोर्नियाको सान होजेमा आयोजित एनभिडियाको वार्षिक सफ्टवेयर डेभलपर सम्मेलनमा गरेका हुन्, जहाँ एनभिडियाले क्वान्टम कम्प्युटिङमा केन्द्रित कार्यक्रम आयोजना गरेको थियो।

एनभिडियाले यो कार्यक्रम जनवरीमा हुआङले उपयोगी क्वान्टम कम्प्युटरहरू आउन अझै २० वर्ष लाग्ने टिप्पणी गरेपछि थपिएको हो। बिहीबार भने उनले क्वान्टम कम्प्युटिङ कम्पनीहरूका कार्यकारीहरूसँग मञ्चमा बसेर आफ्नो त्यो भनाइ फिर्ता लिएका थिए।

“यस कार्यक्रममा पहिलोपटक कुनै कम्पनी सीईओले आफ्नै गल्ती प्रमाणित गर्न पाहुनाहरूलाई बोलाएको छ,” हुआङले भने।

रोयटर्सका अनुसार छोटकरीमा एनभीएक्यूसी भनिने एनभिडिया एक्सेलेरेटेड क्वान्टम रिसर्च सेन्टरले क्वान्टिन्यूम, क्वान्टम मेसिन्स र क्वएरा कम्प्युटिङजस्ता क्वान्टम फर्महरूसँग सहकार्य गर्नेछ। एनभिडियाले यो केन्द्र यसै वर्ष सञ्चालनमा आउने जनाएको छ।

हुआङले एक दर्जनभन्दा बढी कम्पनीका कार्यकारीहरूसँग उद्योगको अवस्थाबारे छलफल गरे, जसमा केही कम्पनीहरूले क्वान्टम कम्प्युटरहरूले हालका कम्प्युटरहरूलाई उछिन्नुअघि नै क्वान्टम प्रविधिबाट आम्दानी गर्ने प्रयास गरिरहेका छन्।

इन्फ्लेक्सनका सीईओ म्याट किन्सेलाले भने, “हामीले अहिले नै विभिन्न क्लासिकल कम्प्युटिङ चिपहरूलाई समक्रमण गर्न मदत गर्ने उत्कृष्ट कम्प्युटिङ घडीहरू प्रदान गर्न सक्छौं।”

किन्सेलाले थपे, “हामी त्यस्ता क्षेत्रहरूमा आम्दानी गर्ने रणनीति अपनाइरहेका छौं, जहाँ हामीलाई हालैको क्वान्टम फाइदा छ।”

क्वान्टम कम्पनीका कार्यकारीहरूले उनीहरूका मेसिनहरूले एनभिडियाका ग्राफिक्स प्रोसेसिङ युनिट (जीपीयू) हरूलाई केही कामहरूमा उछिन्ने भए तापनि, क्वान्टम मेसिनहरूले परम्परागत कम्प्युटरहरूलाई विस्थापित नगर्ने बताए।