काठमाडौं ।
अमेरिकी राष्ट्रपति डोनाल्ड ट्रम्पको नीतिले लगानीकर्ताहरूलाई त्रसित बनाइरहँदा यस वर्ष आठ प्रविधि अर्बपतिहरूको संयुक्त सम्पत्ति लगभग २६६ अर्ब डलरले घटेको छ।
यो संख्या सेल्सफोर्स, म्याकडोनाल्ड र वेल्स फार्गो लगायत अमेरिकाका धेरैजसो ठूला कम्पनीहरूको बजार मूल्यभन्दा बढी भएको बिजनेस इनसाइडरलाई उद्धृत टेलिग्राफले रिपोर्ट गरेको छ।
टेस्ला र स्पेसएक्सका सीईओ इलन मस्क सम्पत्ति गुमाउनेहरूको सूचीमा शीर्ष स्थानमा रहेको ब्लूमबर्ग बिलियनेर्स इन्डेक्सले बताएको छ।
त्यस अवधिमा टेस्लाको शेयर ४५ प्रतिशतले घटेपछि विश्वका सबैभन्दा धनी व्यक्ति इलन मस्कको पछिल्लो १० हप्तामा १३२ अर्ब डलर वा उनको सम्पत्तिको ३० प्रतिशत गुमेको छ।
अमेजनका जेफ बेजोस, ओर्याकलका ल्यारी एलिसन, डेल टेक्नोलोजीका माइकल डेल र एनभिडियाका जेन्सेन हुआङको यस वर्ष आफ्नो कम्पनीको स्टक मूल्य घटेपछि प्रत्येकको कुल सम्पत्ति २० अर्ब डलरभन्दा बढी घटेको देखिएको छ।
यस बाहेक उक्त समूहमा रहेका अल्फाबेटका सह–संस्थापक ल्यारी पेज र सर्गेई ब्रिनले गुगलको मूल कम्पनीको शेयरमा १२ प्रतिशत गिरावट आएपछि यस वर्ष लगभग १८ अर्ब डलर र १७ अर्ब डलरको साथ र माइक्रोसफ्टको शेयरमा १० प्रतिशत गिरावट आएपछि स्टिभ बाल्मरको लगभग १३ अर्ब डलरको गिरावट आएको टेलिग्राफले उल्लेख गरेको छ।
प्रकाशित: २८ फाल्गुन २०८१, बुधबार
