फेरि आकाशमै विस्फोट भयो स्पेसएक्सको स्टारशिप, देखियो क्यारेबियन समुद्रतर्फ झर्दै गरेको आगोको वर्षा  

काठमाडौं ।

स्पेसएक्सको ठूलो स्टारशिप अन्तरिक्ष यान बिहीबार टेक्सासबाट उडान भरेको केही मिनेटमै अन्तरिक्षमा विस्फोट भएको छ। यो वर्ष ईलन मस्कको मङ्गल ग्रह परियोजनाका लागि दोस्रो असफलता हो। दुर्घटनापछि एफएएले फ्लोरिडाको केही भागमा हवाई यातायात रोकेको छ।

सामाजिक सञ्जालमा पोस्ट गरिएका भिडियोहरूमा दक्षिण फ्लोरिडा र बहामासको आकाशमा जलेका टुक्राहरू देखिएका छन्। स्पेसएक्सको प्रत्यक्ष प्रसारण अनुसार, स्टारशिप अनियन्त्रित रूपमा घुम्न थालेपछि यसको इन्जिन बन्द भएको थियो, त्यसपछि अन्तरिक्षमा नै टुक्राटुक्रा भयो।

यो आठौं स्टारशिप परीक्षण असफल भएको हो। सातौं परीक्षण पनि झण्डै एक महिना अघि विस्फोटमै समाप्त भएको थियो। अघिल्ला सफल चरणहरूमा असफलता देखिनु स्पेसएक्सका लागि पछाडि हटेको संकेत हो। मस्कले यस वर्ष यसलाई तीव्र गतिमा अघि बढाउने लक्ष्य राखेका थिए।

रोयटर्सका अनुसार १२३ मिटर अग्लो यो रकेट प्रणाली मस्कको दशकको अन्त्यसम्म मानिसलाई मङ्गल ग्रहमा पठाउने योजनाको केन्द्रमा रहेको छ।

संघीय उड्डयन प्रशासन (एफएए) ले मियामी, फोर्ट लौडरडेल, पल्म बीच र अर्ल्यान्डो विमानस्थलहरूमा छोटो समयका लागि उडानहरू रोक्यो। एफएएले यस घटनाको अनुसन्धान सुरु गरेको जनाएको छ।

रकेट बेलुकी ६:३० (पूर्वी समय) ईटी (२३:३० जीएमटी) मा टेक्सासको बोका चिका परीक्षण स्थलबाट प्रक्षेपण गरिएको थियो। सुपर हेभी पहिलो चरणको बूस्टर योजनाअनुसार पृथ्वीमा फर्कियो र स्पेसएक्सको क्रेनले सफलतापूर्वक नियन्त्रणमा लियो।

तर केही मिनेटपछि, प्रत्यक्ष प्रसारणमा स्टारशिपको माथिल्लो भाग अन्तरिक्षमा घुमिरहेको देखियो। रकेटका धेरै इन्जिन बन्द भएको थियो। त्यसपछि कम्पनीले स्टारशिपसँग सम्पर्क गुमाएको घोषणा गर्‍यो।

“दुर्भाग्यवश, यसअघि पनि यस्तै भएको थियो, त्यसैले हामीसँग अब केही अनुभव छ,” स्पेसएक्सका प्रवक्ता ड्यान हुटले प्रत्यक्ष प्रसारणमा भने।

बिहीबार राति स्पेसएक्सले दिएको विज्ञप्तिमा स्टारशिपको पछिल्लो भागमा “ऊर्जाशील घटना” भएको कारण धेरै इन्जिन बन्द भएको उल्लेख गरिएको छ।

“यसले नियन्त्रण गुमाउने अवस्था सिर्जना गर्‍यो र अन्ततः स्टारशिपसँग सम्पर्क विच्छेद भयो। अन्तिम सम्पर्क प्रक्षेपण भएको करिब ९ मिनेट ३० सेकेन्डपछि भएको थियो,” विज्ञप्तिमा भनिएको छ।

खसेका यी अनगिन्ति टुक्रामा कुनै विषालु पदार्थ नभएको स्पेसएक्सले दावी गरेको छ।

यसअघि जनवरीमा भएको परीक्षण पनि आठ मिनेटमै विस्फोट भएको थियो, जसले क्यारिबियन टापुहरूमा टुक्रा खसाल्यो र टर्क्स एण्ड कैकोस टापुमा एउटा कारमा सानो क्षति पुर्‍यायो।

एफएएले स्पेसएक्सलाई कारण पहिचान गर्न र अर्को परीक्षण अघि स्वीकृति लिनुपर्ने जनाएको छ।

एफएएले गत महिना नै अघिल्लो दुर्घटनाको अनुसन्धान जारी राख्दै बिहीबारको परीक्षणका लागि अनुमति दिएको थियो। लाइसेन्स अनुमोदन गर्दा एफएएले प्रारम्भिक अनुसन्धानका विवरण हेरेर यो उडान अघि बढ्न सक्ने ठहर गरेको थियो।

यस परीक्षणमा स्टारशिपले लगभग पृथ्वीको एक पूरा परिक्रमा गर्ने र हिन्द महासागरमा पुन: प्रवेश गरी पानीमा अवतरण गर्ने योजना थियो। स्पेसएक्सले भविष्यमा जमिनमा अवतरण गर्ने लक्ष्य राखेको छ, जसका लागि यो परीक्षण महत्वपूर्ण मानिएको थियो।