चीनले आफ्नो अन्तरिक्ष स्टेशनमा पाकिस्तानलाई दियो स्थान, पहिलो पटक विदेशी यात्रु पठाउने

काठमाडौं ।

चीनले आफ्नो अन्तरिक्ष स्टेशनमा पाकिस्तानी अन्तरिक्ष यात्रीलाई पाहुनाको रूपमा पठाउने भएको छ। चीनले तियाङगोङ अन्तरिक्ष स्टेशनमा पहिलो विदेशी पाहुनाको रूपमा पाकिस्तानबाट एक अन्तरिक्ष यात्री पठाउने घोषणा गरेको छ।

चीनको मानव अन्तरिक्ष उडान कार्यक्रम सञ्चालन गर्ने एजेन्सी चाइना म्यान्ड स्पेस एजेन्सी (सीएमएसए) का अनुसार, चीन र पाकिस्तानले गत शुक्रबार एक सम्झौतामा हस्ताक्षर गरेका छन्। सम्झौतामा चीनले अन्तरिक्ष अभियानका लागि पाकिस्तानी अन्तरिक्ष यात्रीहरू छनोट गर्ने र उनीहरूलाई तालिम पनि दिने उल्लेख छ।

पाकिस्तानलाई चीनको नजिकको सहयोगी मानिन्छ र दुई देशले अन्तरिक्ष क्षेत्रमा आफ्नो साझेदारीलाई बलियो बनाउँदैछन्। पाकिस्तानी अन्तरिक्ष यात्रीलाई अन्तरिक्षमा पठाउने सम्झौतामा चाइना म्यान्ड स्पेस एजेन्सी (सीएमएसए) र पाकिस्तानको एजेन्सी स्पेस एण्ड अपर एटमोस्फियर रिसर्च कमिसन (सुपार्को) ले इस्लामाबादमा एक समारोहमा हस्ताक्षर गरेको चीनको सरकारी पत्रिका चाइना डेलीले रिपोर्ट गरेको छ। समारोहमा पाकिस्तानी प्रधानमन्त्री शाहबाज शरीफ पनि उपस्थित थिए।

आफ्नो नजिकको मित्र पाकिस्तानलाई सहयोग गर्न, चीनले विगत केही वर्षदेखि यसको लागि भूउपग्रहहरू पनि प्रक्षेपण गरिरहेको छ। यो अन्तरिक्ष क्षेत्रमा पाकिस्तानसँग चीनको सहकार्यको एक हिस्सा हो।

चीनको अन्तरिक्ष स्टेशन तियानगोङ हाल पृथ्वीबाट ४०० किलोमिटर माथि परिक्रमा गरिरहेको छ। यसले विगत चार वर्षदेखि पृथ्वीको परिक्रमा गर्दै आएको छ। यसलाई कुनै समयको रुसको अन्तरिक्ष स्टेशन ‘मिर’को प्रतिरुप मानिन्छ।

चीनको आफ्नै अन्तरिक्ष स्टेशन

अन्तर्राष्ट्रिय अन्तरिक्ष स्टेशन (आईएसएस) बाट बाहिर राखिएको हुनाले चीनलाई आफ्नै अन्तरिक्ष स्टेशन बनाउनु आवश्यक भएको थियो। त्यसैले चीनले तियाङगोङ अन्तरिक्ष स्टेशन बनायो। चीनको अन्तरिक्ष कार्यक्रम चिनियाँ सेना, पिपुल्स लिबरेशन आर्मी (पीएलए) द्वारा सञ्चालित भएकोमा पश्चिमी राष्ट्रहरू चिन्तित भएकोले चीनलाई बाहिर राखिएको थियो।

चीनको यो अन्तरिक्ष स्टेशन अब चीन र अमेरिका बीचको नयाँ प्रतिस्पर्धाको केन्द्र बनेको छ।