गुगलद्वारा आफ्नो एआई सहायक जेमिनीमा नयाँ फिचरहरू थप

काठमाडौं ।

गुगलले आफ्नो एआई सहायक जेमिनीमा नयाँ फिचरहरू थप्दै छ जसले प्रयोगकर्ताहरूलाई भिडियो तथा स्क्रीनमा देखिएको सामग्री प्रयोग गरेर वास्तविक समयमा प्रश्न सोध्न सक्षम बनाउँछ।

बार्सिलोनामा आयोजित मोबाइल वर्ल्ड कङ्ग्रेस २०२५ मा कम्पनीले नयाँ ” स्क्रीनशेयर ” फिचर प्रदर्शन गर्यो। यसले प्रयोगकर्ताहरूलाई आफ्नो फोनको स्क्रीन जेमिनीसँग सेयर गरेर सोधपुछ गर्न सक्ने बनाउँछ। उदाहरणस्वरूप, कम्पनीले एउटा भिडियो देखायो जहाँ प्रयोगकर्ताले फराकिला जिन्स किनिरहेका थिए र जेमिनीसँग त्यससँग मेल खाने अन्य लुगा के हुन सक्छ भनेर सोधेको टेकक्रञ्चले उल्लेख गरेको छ।

भिडियो खोजी फिचरको कुरा गर्दा गुगलले यो फिचर गत वर्ष गुगल आई/ओ मा टिज गरेको थियो। यो फिचरले प्रयोगकर्ताहरूलाई भिडियो खिच्दा नै जेमिनीसँग सोधपुछ गर्ने सुविधा दिन्छ।

गुगलले यी फिचरहरू यसै महिनाको अन्त्यसम्ममा गुगल वन एआई प्रिमियम प्लानअन्तर्गत जेमिनी एडभान्स्ड प्रयोगकर्ताहरूका लागि एण्ड्रोइडमा उपलब्ध हुने बताएको छ।