इटलीको करसम्बन्धी मुद्दा मिलाउन गुगलले ३४ करोड डलर तिर्ने

काठमाडौं ।

मिलानका अभियोजनकर्ताहरूले बुधबार घोषणा गरेअनुसार यूरोपमा रहेको गुगलको शाखाविरुद्धको कर मुद्दा फिर्ता लिने योजना भएको छ। यो निर्णय कम्पनीले ३२६ मिलियन यूरो (३४० मिलियन डलर) तिर्न सहमत भएपछि गरिएको हो।

यो सम्झौतामा २०१५ देखि २०१९ को बीचको कर दायित्व, जरिवाना, थप शुल्क र ब्याज समेटिने अभियोजनकर्ताहरुले जनाएका छन्।

गत वर्ष रोयटर्सले इटालीले गुगलसँग १ अर्ब यूरो बक्यौता कर र जरिवाना तिर्न आग्रह गरेको रिपोर्ट गरेको थियो। यो माग अमेरिका-आधारित कम्पनीले सन् २०१७ मा रोम अधिकारीहरूसँग गरेको अघिल्लो कर विवादको सम्झौता पछि आएको हो।

मिलानका अभियोजनकर्ताहरूले गुगलले इटालीमा भएको आम्दानीमा कर तिरेको छैन भन्ने आरोप लगाएका थिए। उनीहरूले कम्पनीको डिजिटल पूर्वाधारलाई आधार मानेर उक्त दावी गरेका थिए।

सन् २०१७ मा गुगलले इटालीमा स्थायी उपस्थिति रहेको ठहर गर्दै ३०६ मिलियन यूरो तिरेर अघिल्लो मुद्दा टुंग्याएको थियो।