ई-कमर्स कम्पनी अमेजनमाथि स्मार्टफोन मार्फत उपभोक्ताहरूको निगरानी गरेको आरोप

काठमाडौं ।

ई-कमर्स जायन्ट अमेजनमाथि उपभोक्ताहरूको स्मार्टफोन मार्फत गोप्य रूपमा उनीहरूको आवागमन ट्र्याक गर्ने र सङ्कलन गरिएको डाटा बेच्ने आरोप लागेको छ।

एक कानुनी मुद्दामा, कम्पनीले अमेजन विज्ञापन एसडीके (Amazon Ads SDK) कोड ठूलो संख्यामा एप विकासकर्ताहरूलाई उनीहरूको एपहरूमा इम्बेड गर्नको लागि उपलब्ध गराएको बताइएको छ।

अमेरिकाको सान फ्रान्सिस्को अदालतमा दायर गरिएको उजुरीमा अमेजनले उपभोक्ताहरूको बसोबास, काम, किनमेल र भ्रमणहरूको सम्बन्धमा ठूलो मात्रामा भौगोलिक स्थान डाटा सङ्कलन गरेको उल्लेख छ। यसले उपभोक्ताहरूको बारेमा संवेदनशील जानकारी उजागर गरेको छ।

अदालती उजुरीका अनुसार, “अमेजनले उपभोक्ताहरूको बारेमा उनीहरूको ज्ञान वा सहमति बिना ठूलो मात्रामा व्यक्तिगत जानकारी प्राप्त गरेको छ।”

यो उजुरी क्यालिफोर्नियाका बासिन्दा फेलिक्स कोलोटिन्स्कीले दर्ता गरेका हुन्। उनले आफ्नो मोबाइलमा ‘स्पीडटेस्ट बाइ ओक्ला (Speedtest by Ookla)’ मार्फत अमेजनले आफ्नो व्यक्तिगत जानकारी प्राप्त गरेको रिपोर्ट गरेका छन्। फेलिक्सले कम्पनीको आचरणले क्यालिफोर्नियाको अनधिकृत कम्प्युटर पहुँच विरुद्धको कानूनको उल्लङ्घन गरेको बताए। उनी क्यालिफोर्नियाका जनताहरुका लागि लाखौंको क्षतिपूर्ति खोजिरहेका छन्।

विगत केही वर्षदेखि, उपभोक्ताहरू र नियामकहरूले कम्पनीहरूले उनीहरूको सहमति बिना उनीहरूको स्मार्टफोनबाट जानकारी सङ्कलन गरेर नाफा कमाउन खोजिरहेको गुनासो गरिरहेका छन्।

यसअघि पनि केही ठूला कम्पनीहरू विरुद्ध यस्ता कानुनी मुद्दा दायर भएका छन्।