निटाका गाडीहरुको ‘आफ्टर सेल्स सर्भिस’ दयनीय, मर्मत गर्न दिएको ३ महिनामा पनि फिर्ता नपाएको गुनासो

काठमाडौं ।

एउटा मैलो र कच्ची बाटो, एक साइडमा धुलोले छोपिन लागेको गाडी अनि अर्को साइडमा कालोपत्रैको रेडीमिक्सको मिक्सरजस्तो च्यासिस, सँगै एउटा सेतो गाडी, अलि पर धुलाम्मे २ ओटा गाडी भएको एउटा  ग्यारेज !

यो सीजी मोटर्सको निटा गाडीहरु मर्मत गर्ने ग्यारेजको बारेमा सामाजिक सञ्जालमा भाइरल भएको एक भिडियो फुटेजमा देखिएको दृश्य हो। यो भिडियोको शीर्षक अङ्रेजीमा यसप्रकार लेखिएको छ: Don’t buy Neta X ev car जसको अर्थ हुन्छ- निटा एक्स ईभी कार नकिन्नुहोस्।

यो भिडियो एक्स एकाउन्टमा @DnesKazi ह्याण्डल भएका दिनेश एसी नाम गरेका व्यक्तिले राखेका हुन्। तर भिडियो खिच्ने र त्यसमा बोल्ने व्यक्ति भने उनी होइनन्। उनले अरु कसैको भिडियो आफ्नो ह्याण्डलमा अपलोड मात्र गरेको देखिन्छ।

उक्त भिडियोमा भिडियो खिच्ने व्यक्ति बोल्दै अगाडि बढ्दै जान्छन् जसमा ‘निटा एस गाडी बिग्रिएमा कम्पनीबाट राम्रो रेस्पोन्स नआउने, गाडी बनाउन दिएको साढे २ देखि ३ महिना भएको, एउटा ओइल फिल्टर चेञ्ज गर्न १ हप्ता लागेको, काम गर्ने ठाउँमा गाडीको पार्टपुर्जा खोलेर राखेको तर कामदार नभएको, त्यहाँ थुपारिएका सामान हेर्दा कवाडखाना हो वा ग्यारेज भन्ने छुट्याउन गाह्रो परेको लगायतको कुराहरु सुन्न सकिन्छ।

भिडियोका हिसाबले उनी केही समयअघि निटा गाडी खरिद गरेका एक गाडीधनी भएको पुष्टि गर्छ भने उनका शब्दहरुले गाडीको आधिकारिक बिक्रेता प्रतिको वितृष्णा झल्काउँछन्।

भिडियोमा अलिक विरोधाभासपूर्ण भने ‘ओइल फिल्टर’ फेरेको भन्ने छ। भिडियोकै कमेन्टमा पनि कसैले ईभीमा ओइल फिल्टर नहुने उल्लेख गरेका छन्।

टेक्नोलोजीखबरले कुराकानी गरेको ईभी मर्मतमा दक्ष एक प्राविधिकका अनुसार ईभीमा ओइल फिल्टर हुँदैन बरु मोटरबाट चल्ने भएकाले यसमा ‘एसी फिल्टर’ भन्ने पुर्जा हुन्छ। सम्भवत: यो भिडियो बनाउने गाडीधनीले ‘एसी फिल्टर’ भन्न खोजेको हुनु पर्छ।

यो ग्यारेज कुन ठाउँको हो भन्ने उल्लेख गरिएको छैन तर भिडियोको दृश्य हेर्दा अवस्था निकै टिठलाग्दो देखिन्छ। यो भिडियो सामग्रीका आधारमा हेर्ने हो भने चौधरी ग्रुप अन्तर्गतको सीजी मोटर्सले नेपालमा ल्याएर बिक्री गर्ने गरेको चिनियाँ ईभी ब्राण्ड निटाको ‘आफ्टर सेल्स सर्भिस’ दयनीय रहेको प्रस्ट हुन्छ।

‘नेटा एक्स ५६ लाखको गाडी किन्नुभयो भने तपाईँको हालत यस्तो हुन्छ हेर्नुस्, उनी भिडियोमा भनिरहेका छन्, ‘ नेटाको गाडी किन्नु एकदम बेकार छ।’

एक्समा राखिएको भिडियो सँगै उनले हेलो सरकारलाई मेन्सन गर्दै लेखेका छन्, ‘चाचा चौधरीले चाईनिज खेलौनाजस्ता गाडी ल्याएर भिडाउने अनि फाल्दिने नै रैछ। गाडी भित्र्याउने लाईसेन्स दिएपछि त्यसको after sale service .. बारे नि मापदण्ड तोकेर अनुगमन गर्नुपर्दैन ? देशलाई कवाडखाना बनाउने ?’

निटा ईभीको उत्पादक चीनको होजोन अटो कम्पनी हो। यो कम्पनीले चीनमा बिक्रीको अवस्था नाजुक भएको कारण देखाउँदै गत कार्तिक अन्तिम साता आफ्नो झेजियाङ फ्याक्ट्रीमा निर्माण हुने निटा ईभीको उत्पादन बन्द गरेको थियो। मूल कम्पनी बन्द भए पछि नेपालमा निटा गाडी किन्नेहरुको अवस्था के कसो हुने हो भन्ने अन्योल फैलिएको छ।

तर, नेपालमा केही समययता दुई, तीन र चार पाङ्रे ईभी सवारी साधन भित्र्याउने होडबाजी नै चलेको छ। यस्ता सवारीसाधनहरु परीक्षणकालमै रहेका र यीनको रिसेल भ्यालु पनि नभएको अवस्थामा आफ्टर सेल्स सर्भिसको हालत पनि यस्तो दयनीय हुँदा अबको केही वर्षमा नेपाल विद्युतीय सवारीको अघोषित डम्पिङ साइट वा कवाडखाना पो बन्ने हो कि भन्ने गम्भीर प्रश्न जन्मिएको छ।

सो भिडियो र निटाको आफ्टर सेल्स सर्भिसको बारेमा थप बुझ्नका लागि निटा गाडीको मर्मत सम्भार हेर्ने निकायमा हामीले सम्पर्कको प्रयास गरेका छौं। थप नयाँ जानकारी आएमा अपडेट गर्नेछौं।