टेस्लाको साइबर ट्रक अमेरिकाको ‘ट्रम्प लस भेगस’ होटल बाहिर विस्फोट, चालकको मृत्यु

काठमाडौं ।

बुधबार ट्रम्प इन्टरनेशनल होटल लस भेगस बाहिर एउटा टेस्ला साइबरट्रक विस्फोट हुँदा चालकको मृत्यु भएको छ भने विस्फोटमा अन्य सात जना घाइते भएका छन्। साथै एफबीआईले विस्फोटमा आतंकवादीको हात रहेको वा नरहेको बारे अनुसन्धान गरिरहेको अधिकारीहरूले बताएका छन्।

होटल भित्र र बाहिर प्रत्यक्षदर्शीहरुद्वारा खिचिएको भिडियोहरुमा होटल बाहिर रहेको गाडी विस्फोट भएर आगो निस्किरहेको देखिएको उल्लेख छ।

न्यू अर्लिन्समा नयाँ वर्ष मनाउनेहरूको भीडमा एक व्यक्तिले ट्रकले हानेर १५ जनाको मृत्यु भएको केही घण्टापछि यो घटना भएको बताइएको छ।

लस भेगसमा रहेको ट्रम्प इन्टरनेशनल होटल ट्रम्प अर्गनाइजेसनको हिस्सा हो र उक्त कम्पनी राष्ट्रपति निर्वाचित डोनाल्ड ट्रम्पको हो। राष्ट्रपति निर्वाचित डोनाल्ड ट्रम्प जनवरी २० तारिखमा ह्वाइट हाउस फर्किँदैछन्। टेस्लाका सीईओ इलन मस्क सन् २०२४ को राष्ट्रपतिको चुनावी अभियानमा ट्रम्पको प्रमुख समर्थक थिए भने अब आगामी राष्ट्रपतिका सल्लाहकार पनि हुन्।

“स्पष्ट रूपमा एक साइबरट्रक, ट्रम्प होटल – त्यहाँ धेरै प्रश्नहरू छन् जुन हामीले जवाफ दिनैपर्छ”, लस भेगस मेट्रोपोलिटन पुलिस विभागका शेरिफ केभिन म्याकमहिलले पत्रकार सम्मेलनमा बताएको रोयटर्सले उल्लेख गरेको छ।

त्यसैगरी एफबीआई विशेष एजेन्ट इन्चार्ज जेरेमी श्वाट्र्जले विस्फोट आतंकवादको कार्य हो या होइन भनेर अझै स्पष्ट नभइसकेको  पत्रकारहरूलाई बताएका छन्।

गाडी चलाउने व्यक्तिको पहिचान भएको र उक्त गाडी कोलोराडोमा भाडामा लिएको एफबीआईले थप उल्लेख गरे तपनि सार्वजनिक रूपमा भने ड्राइभरको पहिचान गर्न अझै तयार नभएको उनको भनाई छ।

मस्कले उक्त विस्फोट साइबरट्रक आफैसँग भने सम्बन्धित नभएको बताएका छन्।

“अब हामीले विस्फोट धेरै ठूला आतिशबाजी र/वा भाडामा लिइएको साइबरट्रकको बेडमा राखिएको बमको कारणले भएको पुष्टि गरेका छौं र यो गाडीसँग सम्बन्धित छैन” मस्कले एक्समा एक पोस्टमा भने। “विस्फोटको समयमा सवारी साधनको सबै टेलिमेट्री सकारात्मक थियो” उनले थप उल्लेख गरेका छन्।

टेलिमेट्रीले रिमोट स्रोतहरूबाट डाटाको स्वचालित सङ्कलन समावेश गर्दछ र त्यसलाई केन्द्रीय स्रोतमा फिर्ता पठाउँछ जुन पछि विश्लेषण गर्न सकिने बताइएको छ।

‘२०२४ मोडल–वर्ष साइबरट्रक भित्र एक व्यक्ति मृत फेला परेको थिए र विस्फोटबाट सात जनालाई सामान्य चोटपटक लागेको थियो’ म्याकमहिलले भने। साथै उनले साइबरट्रक र न्यू अर्लिन्स आक्रमणमा प्रयोग भएको गाडी दुबै कार–सेयरिङ सेवा टुरो मार्फत भाडामा लिइएको थियो भनि थप उल्लेख गरेका छन्।

लस भेगस र न्यू अर्लिन्स आक्रमणमा संलग्न सवारी साधनहरू भाडामा लिनेहरू मध्ये कुनै पनि आपराधिक पृष्ठभूमिको भएको र जसले गर्दा उनीहरूलाई सुरक्षा खतराको रूपमा पहिचान गर्न सकिने थियो भनेर कम्पनीले नसोचेको टुरोका प्रवक्ताले भनेको उल्लेख गरिएको छ।

“कानून अधिकारीहरूले दुवै घटनाको अनुसन्धान गर्दैछन् र हामी सक्रिय रूपमा उनीहरूसँग साझेदारी गरिरहेका छौं” प्रवक्ताले थप जानकारी दिएका छन्।

स्थानीय समय अनुसार बिहान ८ः४० बजे साइबर ट्रक ट्रम्प भवन बाहिर आएको म्याकमहिलले बताए। साथै बुधवार पहिले भएको न्यू अर्लिन्स आक्रमणको बारेमा पुलिस सचेत रहेको उनले थप उल्लेख गरे। न्यू अर्लिन्स आक्रमणमा प्रयोग भएको गाडीमा सम्भावित विस्फोटक पदार्थ फेला परेको एफबीआईले बताएको छन्।

लस भेगासका अग्निनियन्त्रकहरूले गाडीमा आगो लागेको चार मिनेटपछि प्रतिक्रिया दिएको र त्यसलाई नियन्त्रणमा लिन सफल भएको बताइएको छ। घाइतेमध्ये सामान्य चोटपटक लागेको दुई जनालाई अस्पताल लगिएको छ। त्यसैगरी घटनापछि ट्रम्प होटल खाली गरिएको र धेरैजसो आगन्तुकहरूलाई अर्को होटलमा सारिएको उल्लेख छ।

ट्रम्प अर्गनाइजेसनका कार्यकारी उपाध्यक्ष र राष्ट्रपति निर्वाचित ट्रम्पका छोरा एरिक ट्रम्पले एक्समा घटनाको बारेमा पोस्ट गरेको बताइएको छ। “आज केहि समय पहिले, ट्रम्प लस भेगासको पोर्टे कोचेरमा इलेक्ट्रिक गाडीमा आगलागी भएको रिपोर्ट गरिएको” भवनको कभर प्रवेशद्वार क्षेत्रमा उल्लेख गर्दै उनले एक्सको पोस्टमा लेखेको रोयटर्सले उल्लेख गरेको छ।

एक्स प्लेटफर्मको पोस्टमा इलन मस्कले लेखेका थिए,  ‘विज्ञहरूले यस घटनाको गहन अनुसन्धान गरिरहेका छन्। हामी उपलब्ध हुने बित्तिकै सबै जानकारी साझा गर्नेछौं। यस्तो चीज हामीले पहिले कहिलै सामना गरेका थिएनौं।’

टेस्ला साइबरट्रक टेस्ला, इंक द्वारा निर्मित इलेक्ट्रिक पिकअप ट्रक हो। यो कार पहिलो पटक सन् २०१९ को नोभेम्बरमा ल्याइएको थियो र यसले आफ्नो फ्युचरस्टिक डिजाइन र उच्च विशिष्टताहरुको लागी ध्यान आकर्षित गरेको टेलीग्राफले उल्लेख गरेको छ।