साइबर कसुरमा कारागारमा रहेका मेडिकल व्यवसायी दुर्गा प्रसाईं रिहा

काठमाडौं ।

साइबर अपराधमा कारागारमा रहेका मेडिकल व्यवसायी दुर्गा प्रसाईं हिरासत मुक्त भएका छन्। सर्वोच्च अदालतले रिहा गर्न आदेश दिएसँगै उनी आज शुक्रबार साँझ केन्द्रीय अनुसन्धान ब्यूरो (सीआईबी) को हिरासतबाट रिहा भएका हुन्।

प्रसाईंलाई गत मंसिर ४ गते प्रहरीले साइबर अपराधको कसुरमा उनको भक्तपुरस्थित निवासबाटै पक्राउ गरेको थियो। पछि साइबरको कसुरमा ४० हजार रुपैयाँ धरौटीमा छुटेलगत्तै उनी आपराधिक लाभ र संगठित अपराधको कसुरमा पक्राउ परेका थिए।

व्यवसायीलाई धम्क्याएको आरोपमा प्रसाईं र उनका सहयोगीमाथि प्रहरीको केन्द्रीय अनुसन्धान ब्यूरो (सीआईबी) ले अनुसन्धान गरिरहेको छ।

उनलाई डा. नहकुल सुवेदी र शारङ्गा सुवेदीको संयुक्त इजलासले रिहा गरेको हो। प्रसाईँका तर्फबाट उनका छोरा निराजन प्रसाईँले दिएको निवेदन उपर सुनुवाई गर्दै सुवेदी द्वयको इजलासले अभियुक्तलाई हिरासतमै राख्ने उद्देश्यले उनीमाथि लागेका अभियोगहरुको एकमुष्ट कारबाही नगरी एउटा अभियोगमा पक्राउ गर्ने छोड्ने र लगत्तै अर्को अभियोगमा पक्राऊ गरेर म्याद थपेको देखिएकोले वैयक्तिक स्वतन्त्रा हनन भएको ठहर्याउँदै तुरुन्तै रिहा गर्न नेपाल प्रहरीको सीआईबीलाई निर्देशन दिएको हो।

‘निवेदकलाई थुनामा नै राखे प्रवृत्त भावना लिई पक्राउ गरी म्याद थप समेत गरेको देखिन आयो। प्रवृत्त भावनाले राखेको थुनालाई कानून बमोजिमकों थुना भनी मान्न नमिल्ने भै यसबाट रिट निवेदकको संविधान प्रदत्त वैयक्तिक स्वतन्त्रताको हकमा गम्भीर आघात पुगेको देखिन आएकाले रिट निवेदक दुर्गा प्रसाद प्रसाईलाई अविलम्व थुनामुक्त गर्नू भनी सर्वोच्च अदालत नियमावली, २०७४ को नियम ३७ बमोजिम बन्दीप्रत्यक्षीकरणको आदेश जारी गरिएको छ’, आदेशमा उल्लेख छ।

प्रसाईँका तर्फबाट अधिवक्ताहरु शम्भु थापा, बालकृष्ण न्यौपाने, टंक प्रसाद दुलाल, सुरेन्द्र भण्डारी र रमण कुमार श्रेष्ठ, किर्तिनाथ शर्मा पौडेल, भद्र प्रसाद (स्वागत) नेपाल, अर्जुन पौडेल, रादीका चम्लागाई र सम्झना देवी कार्कीले बहस गरेका थिए।

यसैगरी प्रत्यर्थीतर्फबाट नायव महान्यायाधिवक्ता डा. टेक बहादुर घिमिरे र सहन्यायाधिवक्ताद्वय सूर्यराज दाहाल र गोविन्द खनालले बहस गरेका थिए।