पुरानो सेवा प्रदायकको दायित्व समाप्त भइसक्यो, ती जनशक्तिसँग संस्थाको कुनै सरोकार छैन: नेपाल टेलिकम

काठमाडौं ।

नेपाल टेलिकमले दूरसञ्चार तालिम तथा अनुसन्धान केन्द्र, बबरमहल, काठमाडौंको सरसफाईको सेवाका लागि नियमसंगत रुपमा नयाँ संस्थाले काम गरिरहेको र पुरानो सेवा प्रदायकको दायित्व समाप्त भएकाले ती जनशक्तिसँग संस्थाको कुनै सरोकार नरहेको प्रस्ट पारेको छ।

टेलिकमले आज एक विज्ञप्ति जारी गरी विगतको सेवा प्रदायक कम्पनीसँग सम्बन्धित जनशक्तिले कम्पनीको प्राङ्गण बाहिर विभिन्न माग राखेर धर्ना दिई कम्पनीको कार्यसम्पादनमा असहजता सिर्जना गर्नुका साथै नयाँ सेवाप्रदायक कम्पनीका जनशक्तिहरुलाई कम्पनीको कार्यालयमा सरसफाई सम्बन्धी कार्य गर्न अवरोध सिर्जना समेत गरेको जनाउँदै विगतको सेवा प्रदायकसँगको दायित्व समाप्त भइसकेको अवस्थामा ती जनशक्तिसँग नेपाल टेलिकमको कुनै सरोकार नरहेको व्यहोरा कम्पनी स्पष्ट पारेको हो।

गत कार्तिक १२ गतेदेखि दूरसञ्चार तालिम तथा अनुसन्धान केन्द्र, बबरमहल, काठमाडौंको प्राङ्गण बाहिर केही व्यक्तिहरुले धर्ना दिइरहेको र आमसर्वसाधारण तथा आमसञ्चार माध्यममा समेत यस बारेमा केही भ्रम पर्न गएकोले स्पष्ट पार्ने प्रयासस्वरुप टेलिकमले विज्ञप्ति प्रकाशन गरिएको कम्पनीको भनाई छ।

विज्ञप्तिमा उल्लेख छ, ‘नेपाल टेलिकमले कम्पनीको सेवा विस्तार, मर्मत सम्भार, सुरक्षा, सरसफाई लगायतका सेवाहरु आवश्यकता बमोजिम बोलपत्र प्रकृयाबाट निश्चित समय तथा कार्य तोकी आउटसोर्सिङका माध्यमबाट निजी सेवा प्रदायक कम्पनीसँग प्रचलित नियम/कानुन बमोजिम सम्झौता गरी आवश्यक सेवा लिने गरेको छ।  सो सम्झौताको समयावधि वा तोकिएको कार्यावधि समाप्तिसँगै सेवा प्रदायक कम्पनीहरुसँगको दायित्व पनि समाप्त हुने व्यवस्था छ।’