Technology Khabar ७ कार्तिक २०८१, बुधबार
काठमाडौं ।
मुस्ताङ र तिब्बतस्थित कोरला नाकामा नेपाल टेलिकमले मोबाइल टावर स्थापना गरेसँगै सञ्चार सेवाको लागि सहज भएको छ।
मोबाइल सेवा संचालन भएसँगै सीमा नाकामा सुरक्षाको अवस्थाबारे बुझ्न, कोरला नाकाको भ्रमणमा पुग्ने पर्यटकसँग जानकारी लिन र दैनिक रूपमा सूचना आदानप्रदान गर्न सहज भएको जिल्ला प्रहरी कार्यालय मुस्ताङले जनाएको छ।
यसअघि नाका क्षेत्रमा सञ्चारको सुविधा नहुँदा कोरला नाकामा सुरक्षाको अवस्था, पर्यटकलाई परेको समस्या र उद्धार तथा समन्वय गर्न समस्या भइरहेको थियो।
टेलिकमको टावर निर्माणसँगै कोरला नाकाको भ्रमणमा पुग्ने पर्यटकहरू, सामान खरिद–बिक्री गर्ने व्यापारी र स्थानीय तथा सर्वसाधारणहरू लाभान्वित भएका छन्। मुस्ताङको लोमान्थाङ गाउँपालिका–१, छोसेर स्थित कोरला नाकामा यही असोजको दोस्रो सातादेखि टेलिकमको टावर स्थापना गरी सञ्चालनमा ल्याइएको हो।
नाका क्षेत्रमा नै सञ्चार सुविधाको विस्तार भएकाले खासगरी सूचना तथा जानकारीहरु आदानप्रदानमा सहज भएको लोमान्थाङ गाउँपालिकाले जनाएको छ।
नेपाल टेलिकम दूरसञ्चार कार्यालय बागलुङको प्राविधिक तथा लोमान्थाङ गाउँपालिकाको भौतिक सहयोगमा टेलिकमको बिटिएस टावर स्थापना गरिएको हो।
समुन्द्री सतहदेखि करिब ४७ सय मिटरको उचाइमा रहेको कोरला नाकामा टेलिकमको टूजी र फोरजी टावर सोलारको माध्यमबाट चल्ने गरी जडान गरिएको जनाएको छ।
कोरला नाका क्षेत्रमा नेपाल टेलिकमको टावर सञ्चालनसँगै नाकामा हुन सक्ने अवाञ्छित क्रियाकलापहरु रोक्नका लागि समेत सहयोग पुग्ने अपेक्षा गरिएको छ।
कोरला नाकाको नेपालतर्फ गएको असार महिनामा गण्डकी प्रदेश सरकारको आर्थिक सहयोगमा पूर्वाधार विकास कार्यालय मुस्ताङमार्फत एकीकृत भवन निर्माण भईसकेको छ।
प्रकाशित: ७ कार्तिक २०८१, बुधबार
