गुल्मीका वडामै पुगेर राष्ट्रिय परिचयपत्र वितरण

काठमाडौं ।

गुल्मी जिल्लामा वडामै पुगेर राष्ट्रिय परिचयपत्र वितरण गर्न लागिएको छ। कात्तिक ८ गते बिहीबारदेखि वडा तहमै पुगेर राष्ट्रिय परिचयपत्र वितरण गर्न लागिएको हो।

पहिलो चरणमा यहाँका स्थानीय तहका वडामा पुगेर राष्ट्रिय परिचयपत्र बनाउन वैयक्तिक र जैविक विवरण सङ्कलन अभियान गरिएको थियो । तयार भएर आएका राष्ट्रिय परिचयपत्रका कार्डलाई वडामै पुगेर वितरण अभियान सुरु गर्न लागिएको हो।

पहिलो चरणमा धुर्कोट, कालीगण्डकी, गुल्मीदरबार र इस्मा गाउँपालिकाका वडामा नै पुगेर कार्ड वितरण गर्न लागिएको छ। राष्ट्रिय परिचयपत्र वितरण गर्न बाँकी रहेका स्थानीय तहमा तिहार पछि वितरण सुरु गरिने छ।

स्थानीय तहका जनप्रतिनिधि एवं सरोकारवालासँगको अन्तक्रियामा यस जिल्लाबाट राष्ट्रिय परिचयपत्रका लागि हालसम्म एक लाख ९४ हजार ४३२ जनाको विवरण सङ्कलन भएकोमा एक लाख ६४ हजार ४२३ जनाको कार्ड छपाइ भएको राष्ट्रिय परिचयपत्र व्यवस्थापन शाखाका निर्देशक तुलसीप्रसाद दाहालले जानकारी दिए। निर्देशक दाहालका अनुसार जिल्ला प्रशासन कार्यालय गुल्मीबाट ६६ हजार ३१५ जनाको विवरण सङ्कलन गरिएको छ। जसमा ४० हजार ६९४ जनाको कार्ड छापिएको मध्ये हालसम्म प्रशासन कार्यालयबाट पाँच हजार ४६१ जनालाई कार्ड वितरण गरिएको उहाँले जानकारी दिए।

यस जिल्लामा राष्ट्रिय परिचयपत्र छापिएर आएको हुँदा वडामै पुगेर कार्ड वितरण अभियान थालिएको प्रमुख जिल्ला अधिकारी कृष्णप्रसाद शर्माले बताए। राष्ट्रिय परिचयपत्र लिँदा पुनः जैविक विवरण जाँच गरी वितरण गर्नुपर्ने भएकाले सम्बन्धित व्यक्तिले नागरिकता, राष्ट्रिय परिचयपत्रका लागि विवरण सङ्कलन गर्दाको सक्कली रसिद अनिवार्य लिएर जानुपर्ने उनको भनाइ छ। गोरखापत्रबाट