अन्तरिक्षमा निजी लगानी अत्यावश्यक भएको इटालियन स्पेस एजेन्सीका प्रमुखको भनाई

काठमाडौं ।

इटालियन स्पेस एजेन्सी (एएसआई) का प्रमुख टियोडोरो भालेन्टेले अन्तरिक्ष क्षेत्रमा निजी लगानी र लगानीको वृद्धि महत्त्वपूर्ण रहेको तर यसको उचित नियमन गर्नुपर्ने आवश्यकता रहेको बताएका छन्। मिलानमा हुन लागेको एक सम्मेलनअघि भालेन्टेले आइतबार यस्तो बताएका हुन्।

अक्टोबर १४ मा सुरू हुने इन्टरनेशनल एस्ट्रोनोटिकल कंग्रेसको अघि भालेन्टेले रोयटर्ससँग भने, “हामीले अन्तरिक्ष क्षेत्रमा निजी कम्पनीहरूको आगमनलाई आलोचना गर्नु हुँदैन।” उनले थपे, “अन्तरिक्ष अर्थतन्त्रको तीव्र वृद्धि गर्ने सबै अनुमानहरू निजी कम्पनीहरूको ठोस प्रवेश बिना पूरा हुन सम्भव हुँदैन।”

भालेन्टेले यसलाई स्पष्ट पार्दै भने, “निजी लगानी अत्यावश्यक छ, किनकि यसले सार्वजनिक स्रोतहरूको प्रभावलाई धेरै गुणा गर्न सक्ने बनाउँछ।”
वर्ल्ड इकोनोमिक फोरम र म्याकिन्सीको एक रिपोर्ट अनुसार सन् २०२३ मा ६३० अर्ब डलरको रहेको विश्व अन्तरिक्ष अर्थतन्त्र २०३५ सम्ममा १.८ ट्रिलियन डलरमा पुग्ने अनुमान गरिएको छ जसमा वार्षिक ९%को औसत वृद्धि हुनेछ। यो वृद्धि दर विश्व जीडीपीको प्रक्षेपित वृद्धिको लगभग दोब्बर हुनेछ।

रोयटर्सका अनुसार यो रिपोर्टले निजी क्षेत्रबाट गरिएको लगानी २०२१ र २०२२ मा ७० अर्ब डलरभन्दा बढीको ऐतिहासिक उच्चांकमा पुगेको थप गरेको छ।

तर भालेन्टेले अन्तरिक्ष क्षेत्रमा निजी कम्पनीहरूको प्रवेशले स्पष्ट कानूनी ढाँचा आवश्यक पर्ने र यसले भूमिका तथा जिम्मेवारी पहिचान गर्ने र यस क्षेत्रको दीर्घकालीन दिगोपनलाई सुनिश्चित गर्ने थप गरेका छन्।

उनले भने, “समाधान गर्न सकिने समस्याहरूलाई सम्बोधन गर्न सकियोस् भन्ने हेतुले यो नियम आवश्यक छ,” र इटालीले हालै घोषणा गरेको अन्तरिक्ष क्षेत्रका लागि बनाइएको ढाँचागत कानूनको उदाहरण दिएका छन्।