पठाओमा ३९ जना सम्मानित, १५ जनालाई पठाओ‌ बेनिफिट कार्यक्रम अन्तर्गत सहयोग

काठमाडौं ।

पठाओ नेपालले वार्षिक सम्मान कार्यक्रम २०८१ आयोजना गर्दै पछिल्लो आर्थिक वर्षमा उत्कृष्ट सेवा प्रदान गर्ने आफ्ना राइडर, क्याप्टेन, डेलिभरी हिरो, पार्सल हिरो, रेस्टुरेन्ट, पार्सल मर्चेन्ट र पार्टनरहरूको योगदानलाई सम्बोधन गरेको छ।

कार्यक्रममा कम्पनीले फरक क्षमता भएका चालकहरूलाई उनीहरूको साहस र योगदानका लागि सम्मान समेत गरेको कम्पनीका प्रबन्ध निर्देशक असिम मानसिंह बस्न्यातले बताए। मानिसको दैनिकी तथा जीवनयापनमा सहज बनाएको भन्दै पठाओलाई विभिन्न व्यक्तित्वहरू मार्फत धन्यवाद आइरहेको उनले बताए। उनले यसको सबै श्रेय आफ्ना मेहनती तथा लगनशील चालक, क्याप्टेन तथा हिरोहरुलाई जाने बताए।

पठाओ नेपालले उत्कृष्ट चालकहरूलाई विभिन्न वर्गमा सम्मानित गरेको छ। सबैभन्दा कान्छा चालक सुमन बाबु मगरातीले ‘द राइजिङ राइडर अवार्ड’ पाएका छन्। यस्तै प्रेम बहादुर खड्काले बेस्ट पफर्मर भई ‘द स्टार मेल राइडर अवार्ड’ पाएका छन्। तीर्थ बहादुर बिष्टले हाइएस्ट राइड लिएका कारण द टायरलेस राइड अवार्ड पाएका छन्।

कम्पनीका अनुसार सुदन अधिकारीले सबैभन्दा बढी रेटिङ पाएर ‘युजर्स फेभराइट राइडर अवार्ड’ पाएका छन्। बिमल श्रेष्ठले द लङ्गेस्ट इन प्ल्याटफर्म भएका कारण ‘द भेटेरन राइडर अवार्ड’ पाएका छन्। साथै श्यामबहादुर चौधरीले नो सस्पेन्सनका कारण द अनरेबल राइडर अवार्ड पाएका छन् ।

यस्तै सुमन खड्कीले मस्ट एक्टिभ डेज अर्थात् सबैभन्दा धेरै सक्रिय भएका कारण ‘द डेडिकेटेड राइडर अवार्ड’ पाएका छन्।

महिलातर्फ बेस्ट राइडरका रूपमा ओम कुमारी चेम्जोङले ‘द स्टार फिमेल राइडर अवार्ड’ पाएकी छिन्। यस्तै पोषबहादुर खत्रीले ओल्डेस्ट राइडरका रूपमा ‘द सेनियर राइडर अवार्ड’ पाउँदा ४७ वर्षकी महिला राइडर सरस्वती महर्जनले ‘सोसल कज’ अन्तर्गत ‘द हेल्पङ ह्यान्ड अवार्ड’ पाएकी छिन्। उनीहरूलाई कम्पनीका निर्देशक शशांक शमशेर थापाले सम्मानित गरेका थिए।

कम्पनीले चालकहरूलाई जस्तै आफ्ना क्याप्टेनलाई पनि विभिन्न किसिमका सम्मान तथा अवार्ड प्रदान गरेको छ। जस अन्तर्गत किशोर गिरीले सबैभन्दा कम उमेरको क्याप्टेन भई द राइजिङ क्याप्टेन अवार्ड पाएका छन् ।

कम्पनीले पठाओ हिरोहरूलाई समेत अवार्ड प्रदान गरेको छ। जस अन्तर्गत नरेन्द्रकुमार तामाङले बेस्ट पर्फर्मेन्स पठाओ हिरो भई द स्टार मेल पठाओ हिरो अवार्ड पाएका छन्।

कम्पनीले फरक क्षमता भएका राइडर पुनम मिश्र, बलराम तामाङ र राजेन्द्र मगरलाई सम्मान तथा प्रोत्साहनका लागि रेजिलिन्स अवार्ड प्रदान गरेको छ।

कार्यक्रममा पठाओ‌ बेनिफिट प्रोग्रामको लाभ उठाउन योग्य भएर स्कलरशिप र बेडरेस्ट एलोभेन्स पाएका चालकहरुलाई पठाओ नेपालका निर्देशक जेनिस रन्जितले सम्मान गरेका थिए।

पठाओ नेपालले आफ्नो फुड डेलिभरीमा सहकार्य गर्ने रेस्टुरेन्टहरुलाई समेत सम्मान तथा अवार्ड प्रदान गरेको छ। जस अन्तर्गत फति’ज् बिर्यानी झम्सिखेल्ले हाइएस्ट अर्डर पूरा गरेकाले ‘अर्डर च्याम्पियन अवार्ड’ पाएको छ।

कार्यक्रममा बस्न्यातले स्टार्टअपबाट सुरु भएको यस कम्पनी अहिले राम्रो व्यवसाय बन्न सफल भएको बताए ‌ पठाओ नेपालले हालै सुरु गरेको आफ्नो नयाँ सेवा पठाओ किराना, पठाओ खाजा र पठाओ गेम्स बारे समेत उनले जानकारी दिए । उनका अनुसार कम्पनीले छिट्टै पठाओ रेन्टल पनि सुरु गर्ने तयारी गरेको छ।