Technology Khabar १८ श्रावण २०८१, शुक्रबार
काठमाडौं ।
डेल्टा एयरलाएन्सका सीईओ एड बास्टियनले क्राउडस्ट्राइक अपडेटले निम्त्याएको आउटेजका कारण ५० करोड डलर क्षति भएको बताएका छन्।
गत जुलाईमा भएको उक्त घटनाका कारण विश्वभर लगभग ८५ लाख विण्डोज डिभाइसहरु नराम्ररी प्रभावित भएका थिए भने आकस्मिक सेवा, सञ्चार तथा हज्जारौं व्यवसायहरु प्रभावित भएका थिए।
सीएनबीसीमा बुधबार बोल्दै बास्टियनले यो रकम ५ दिनमा एयलाइन्सले गुमाएको रकमका साथै दैनिक हुन आउने लाखौं डलर क्षतिपूर्ति तथा होटलको खर्चसमेत जोडेर बनाइएको जानकारी दिए।
एक साताअघि क्राउडस्ट्राइकले अपडेटमा आएको समस्याका कारण आफ्नो साइबर सुरक्षासम्बन्धी सिस्टमले कम्पनीका लाखौं प्रयोगकर्ताको कम्प्युटरमा गलत वा बिग्रिएको डाटा पठाएको थियो।
यसका कारण विह्वभर ८५ लाखभादा बढी विण्डोज डिभाइसमा समस्या आउनुकासाथै एयरलाइन्स, सञ्चार, बैंक, अस्पताल तथा खुद्रा व्यवसाय हरुका सेवा ठप्प भएका थिए।
क्राउडस्ट्राइकले यस्तो समस्या बारम्बार दोहोरिन नदिन आवश्यक उपायहरु अवलम्बन गर्ने प्रतिवद्धता जनाएको छ।
यस्ता उपायहरुमा अल्पकालीन रुपमा सफ्टवेयर अपडेट रोक्ने, प्रयोगकर्तालाई नै नियन्त्रणको अधिकांश अवसर दिने तथा कम्पनीको योजनामा रहेका अपडेटको जानकारी तथा योजना नै सार्वजनिक गर्न तयार रहेको बताए।
प्रकाशित: १८ श्रावण २०८१, शुक्रबार
