स्टार्टअपलाई प्रोत्साहन एवं सहजीकरणका लागि एकद्वार प्रणालीको एक विशेष संयन्त्र तयार पारिने

काठमाडौं ।

सरकारले स्टार्टअपका लागि सहज वातावरण तयार पार्ने बताएको छ।प्रधानमन्त्री केपी शर्मा ओलीले सरकारले राष्ट्रिय गौरवका आयोजनालाई तीव्रता दिँदै सुशासन, कानुनी र नीतिगत सुधारका माध्यमबाट जनतामा सेवा प्रवाह बढाइ आशा जागृत गर्ने बताएका छन।

प्रतिनिधिसभाको आजको बैठकमा विश्वासको मतको प्रस्ताव प्रस्तुत गर्दै सम्बोधनका क्रममा प्रधानमन्त्री ओलीले स्टार्टअप, आइटी र हाइग्रोथ इन्टरप्राइजेजलाई उत्प्रेरित गरी देशभित्र आर्थिक अवसर सिर्जना गर्न अर्थ मन्त्रालयले विद्यमान कानुनी र वित्तीय संरचनाहरूको अध्ययन गर्ने बताएका हुन्।

“स्टार्टअपहरूलाई प्रोत्साहन एवं सहजीकरणका लागि प्रधानमन्त्री तथा मन्त्रिपरिषद्को कार्यालयले एकद्वार प्रणालीको एक विशेष संयन्त्र तयार पार्नेछ। निजी क्षेत्रलाई ‘ग्रोथ इन्जिन’ बनाई उत्पादन, उद्योग र सेवा क्षेत्रमा व्यापक लगानी गराउने, उत्पादन बढाउने र रोजगारी सिर्जना गर्ने काममा केन्द्रित गराउने छौँ। सहकारीहरूको नियमन गर्नेछौँ,” उनले भने, “बचत परिचालन गराउने छौँ। प्राथमिकताका आधारमा राज्यको लगानी स्वास्थ्य, शिक्षा, सुरक्षा, सामाजिक संरक्षण र ठूला पूर्वाधार निर्माणगरी पाँच ठाउँमा केन्द्रित गराउने छौँ।”

यसैगरी उनले सरकारले सूचना तथा प्रविधि, पर्यटन, ऊर्जा, कृषि तथा वन, उद्योग र भौतिक पूर्वाधारलाई आर्थिक वृद्धिको प्रमुख सम्वाहकका रूपमा विकास गर्ने बताए।

म–स्टार्टअप, उद्योगी व्यवसायी, बैंक तथा वित्तीय संस्थाहरुलाई आफ्नो सोच, नवीनता र लगानीलाई यी क्षेत्रमा केन्द्रित गर्न हार्दिक आह्वान गर्दछु। यी प्राथमिकताका छ ओटा मन्त्रालय र यससँग सम्बन्धित सरकारी निकायले यी क्षेत्रमार्फत आर्थिक वृद्धि हुनेगरी नीति नियम तर्जुमा गर्नेछन्। साथै अर्थ मन्त्रालय र राष्ट्र बैंकमार्फत आर्थिक तथा मौद्रिक नीतिलाई यसतर्फ परिलक्षित गराउनेछु,” प्रधानमन्त्री ओलीले भने।