चिनियाँ चिप निर्माता नेक्सपिरियाले युरोपेली बिस्तारका लागि २०० मिलियन डलर लगानी गर्ने

काठमाडौं ।

डायोड र ट्रान्जिस्टर्स जस्ता आधारभूत सेमीकन्डक्टरहरूको संसारको सबैभन्दा ठूलो निर्माताहरू मध्ये एक नेक्सपिरियाले बिहीबार जर्मनीको ह्याम्बर्गमा रहेको आफ्नो मुख्य प्रडक्सन साइटमा क्षमता विस्तार गर्न २०० मिलियन अमेरिकी डलर लगानी गर्ने बताएको छ।

चिनियाँ इलेक्ट्रोनिक्स निर्माता विङटेकको स्वामित्वमा रहेको नेक्सपिरियाले गरेको लगानी, सन् २०२३ मा लन्च गरिएको ईयूको चिप्स ऐन अन्तर्गत राज्य अनुदानको सहायता बिना युरोपमा गरिएको कम्प्युटर चिप लगानीको दूर्लभ उदाहरण हो।

चीनले नेक्सपिरियाले युरोपमा बनाएका कार र घरेलु उपकरणहरूमा पाइने “लेगेसी” चिपहरूको घरेलु चिनियाँ उत्पादनलाई अनुचित रूपमा अनुदान दिइरहेको छ कि छैन भनेर युरोपेली संघले विचार गरिरहेको अवस्थामा यो घोषणा आएको रोयटर्सले रिपोर्ट गरेको छ।

इलेक्ट्रिक कारहरू, “ग्रिन इनर्जी र डिजिटलाइजेसन हाम्रा प्रडक्ट (उत्पादन)हरू बिना अकल्पनीय छ,” सीएफओ स्टेफन टिल्गरले लगानी निर्णयको घोषणा गर्दै एक विज्ञप्तिमा भने, “तिनीहरू नट र बोल्टहरू हुन् जसले नयाँ प्रविधिहरू सम्भव बनाउँछन्।”

युरोपमा उत्पादन गर्दै चीन, इन्डोनेसिया र फिलिपिन्समा एसेम्बली र प्याकेजिङ गरेर नेक्सपिरियाले वार्षिक १०० अर्ब यस्ता चिप्स बनाउने गर्दछ जुन विश्वको आपूर्तिको झण्डै एक चौथाइ हो।

यद्यपि, सन् २०१८ मा विङ्गटेकद्वारा यसको ३.६ बिलियन अमेरिकी डलर अधिग्रहण गरेपछि, निजमेगेन, नेदरल्यान्ड्समा आधारित नेक्सपिरिया अब युरोपेली सरकारहरूको बढ्दो छानबिनको अधीनमा परेको छ।

सन् २०२२ मा, बेलायती सरकारले सुरक्षा चिन्ताको कारण न्युपोर्टको कारखाना हटाउन बाध्य तुल्याएको थियो।

सन् २०२३ मा जर्मन सरकारले यसलाई ब्याट्री दक्षता प्रविधि विकास गर्न अनुदान प्राप्त गर्नबाट अयोग्य ठहराएको थियो। साथै डच सरकारले पूर्वव्यापी परीक्षण पछि एक स्टार्टअप नोभीको खरिदलाई अनुमोदन गरेको थियो।

नेक्सपिरियाले भने ह्याम्बर्गमा सिलिकन कार्बाइड (SiC) र ग्यालियम नाइट्राइड (GaN) को प्रयोग गरी दुई प्रकारका “वाइड ब्यान्डग्याप” चिपहरू बनाउने लाइनहरू थप्ने योजना बनाएको छ, जसको विद्युतीय पूर्वाधारमा महत्त्वपूर्ण प्रयोगहरू हुने गरेका छन्।

यी चिपहरू तिनीहरूको दक्षता, गति, हल्का तौल, र तातो अवस्था र उच्च भोल्टेजहरूमा काम गर्ने क्षमताको लागि नियमित सिलिकन चिपहरूको तुलनामा बढी मन पराइने रिपोर्टले उल्लेख गरेको छ।