बजार क्षेत्र तथा चोकमा सिसिटिभी क्यामरा जडान

काठमाडौं ।

पाल्पा जिल्ला स्थित रामपुर नगरपालिकाले नगरको मुख्य बजार क्षेत्र तथा चोकमा सिसिटिभी क्यामरा जडान गरेको छ। आपराधिक क्रियाकलाप नियन्त्रण गर्न नगरले प्रहरीसँगको समन्वयमा पाँच स्थानमा सिसिटिभी क्यामरा जडान गरेको हो।

बजार क्षेत्रमा सिसिटिभी क्यामरा जडान कार्यक्रममार्फत पाँच स्थानमा थप सिसिटिभी क्यामरा जडानसँगै भएका स्थानको मर्मत गरिएको सूचना प्रविधि अधिकृत महेन्द्रप्रसाद श्रेष्ठले जानकारी दिए। १० लाख रुपियाँ लागतमा नगरको मुख्य बजार बेझाँड चोकमा रहेको पुरानो तीन वटा मर्मतसँंगै एक वटा थप र अन्य चार स्थानमा आठ वटा नयाँ जडान गरिएको उनले बताए।

वडा नं. ७ को किसानबारी बजार, वडा नं. ३ को रजघरा बजार, कालीगण्डकी कोरिडोर अन्तर्गत वडा नं. ४ को सदावर्त चोक र वडा नं. ६ को कालीआँप चोकमा दुई/दुई ओटा क्यामरा जडान गरिएको छ।

पाँच ओटै स्थानमा जडान भएको सिसिटिभी क्यामरा इलाका प्रहरी कार्यालय रामपुरको नियन्त्रणमा रहने गरव्यवस्थापन गरिएको छ।

क्यामरा जडान भएसँगै मुख्य बजार र चोकमा भएका गतिविधिको निगरानीमा थप सहज भएको इलाका प्रहरी कार्यालय रामपुरका प्रहरी निरीक्षक शालिकराम खनालले बताए। गोरखापत्रबाट