शाओमीले ल्याटिन अमेरिका र युरोपका नेतृत्वमा रहेका भ्रष्ट कर्मचारीहरुलाई निकाल्यो

काठमाडौं ।

भ्रष्टाचारविरुद्ध कडा कदम चाल्दै शाओमीले दुई ठूला कर्मचारीलाई कम्पनीबाट बाहिरिने बाटो देखाएको छ। शाओमीले ल्याटिन अमेरिका र युरोपका दुई निर्देशकलाई हटाएको छ।

कम्पनीका अनुसार उनीहरु पटकपटक भ्रष्टाचारमा संलग्न रहेको पाइएको थियो। दुवै प्रबन्धकले विशेष सुविधा पाउनुका साथै उनीहरुलाई मानिसहरुबाट धेरै उपहार र लोभ्याउने कुरा पनि लिएको पाईएको कम्पनीले जनाएको छ। उनीहरुले कम्पनीमा आफ्नो पदको अवैध फाइदा उठाइरहेका थिए।

पश्चिमी युरोप र ल्याटिन अमेरिकाका कम्पनी प्रबन्धकहरू भ्रष्टाचारमा गहिरो डुबेको बताइन्छ। ल्याटिन अमेरिकामा मात्रै, शाओमीले पहिलो क्वाटरमा ५० लाख भन्दा बढी स्मार्टफोनहरू बेचेको छ। जबकि युरोपमा कम्पनी स्मार्टफोन ढुवानीमा सबैभन्दा धेरै बिक्री हुने स्मार्टफोन ब्रान्डको रूपमा तेस्रो स्थानमा छ।

आईटी होमको रिपोर्टअनुसार, ल्याटिन अमेरिका क्षेत्रका पूर्व महानिर्देशक चेन बिङक्सुलाई विशेष फाइदाको बदलामा घूस, उपहार र महँगो मनोरञ्जन लिने गरेको आरोप लगाइएको छ। पूर्व प्रबन्धकले अन्य कम्पनीहरूसँग व्यावसायिक सम्झौतामा हस्ताक्षर गरेको बदलामा विशेष व्यवहार पाएका थिए।

त्यसैगरी, कम्पनीका पश्चिमी युरोपका पूर्व निर्देशक ओवेनले उपहार आदिको प्रलोभनमा परेर धेरै उच्च मूल्यका सम्झौताहरू गरेका थिए। कम्पनीले ओवेनलाई जागिरबाट निकाल्ने मात्र होइन, उनीविरुद्ध कानुनी कारबाही पनि अघि बढाएको छ। कम्पनीले पूर्व सञ्चालक विरुद्ध फौजदारी मुद्दा दायर गरेको छ भने नागरिक क्षतिको मुद्दा समेत दायर गरेको छ। यसरी शाओमीले कम्पनीमा भ्रष्ट कर्मचारीका लागि कुनै ठाउँ नभएको बताएको छ।

शाओमी हाल युरोपमा सामसंग र एप्पलसँग संघर्ष गरिरहेको छ। ल्याटिन अमेरिकामा पनि यस्तै अवस्था छ। क्षेत्रीय नेताहरूले गरेका यस्ता घोटालाका कारण कम्पनीले यी क्षेत्रमा घाटा बेहोर्नुपरेको छ।

क्यानालिसको रिपोर्टका अनुसार कम्पनीले २०२४ को पहिलो त्रैमासिकमा ल्याटिन अमेरिकामा ५.३ मिलियन युनिट बेचेको छ। यहाँ कम्पनीको बजार हिस्सा १५.३ प्रतिशत छ। कम्पनीले वार्षिक ४५ प्रतिशतको वृद्धि हासिल गरेको छ। युरोपमा कम्पनीको बजार हिस्सा १६ प्रतिशत रहेको बताइएको छ।