विद्युतीय कारको उत्पादन बढाउन सबैभन्दा ठूलो कारखानालाई रुपान्तरण गर्दै भोल्भो

काठमाडौं ।

विश्वभर विद्युतीय सवारी साधनको माग बढ्दै गएको छ। यस्तो अवस्थामा कम्पनीहरूले पनि विद्युतीय सवारीको उत्पादन बढाउन पहल गरिरहेका छन्। स्वीडेनको कार निर्माता भोल्भो कारले उत्पादनलाई विद्युतीय कारमा रूपान्तरण गर्न स्विडेनको ऐतिहासिक गोथेनबर्ग प्लान्टमा करिब एक अर्ब युरो लगानी गर्ने समाचार एजेन्सीको रिपोर्टमा उल्लेख छ।

कम्पनीले मंगलबार सो जानकारी दिएको हो। चिनियाँ अटो निर्माता गिलीको स्वामित्वमा रहेको भोल्भोले गत मार्चमा सन् २०३० सम्ममा शतप्रतिशत विद्युतीय दायरामा जाने घोषणा गरेको थियो। अर्थात् अब कम्पनीले ईलेक्ट्रिक भेहिकल मात्रै उत्पादन गर्नेछ। यही उद्देश्यका साथ कम्पनीले आगामी वर्ष विद्युतीय सवारी साधनमा लगानी गर्ने भएको छ।

१९६४ मा खोलिएको यो कारखाना भोल्भोको सबैभन्दा पुरानो र ठूलो कारखाना हो। यसमा लगभग ६,५०० कर्मचारीहरू छन्, जसले एक दिनमा १,२५० सवारी साधनहरू उत्पादन गर्छन्।

यो लगानीले भोल्भोलाई यसको ईलेक्ट्रिफिकेसन रणनीतिको नजिक ल्याएको छ किनभने कम्पनीले स्विडेनी ब्याट्री निर्माता नर्थभोल्टसँग संयुक्त कारखाना निर्माण गर्ने घोषणा गरेको छ। यो गोटेनबर्ग नजिक छ। तीन अर्बको लगानीमा निर्माण भएको यो ब्याट्री कारखानाले ३ हजार जनालाई रोजगारी दिनेछ।

सन् २०१९ देखि भोल्भो कारले हाइब्रिड वा सबै विद्युतीय मोडलहरू मात्र बेच्न मात्र सीमित गरेको छ। यो विद्युतीय सवारी साधनको सबैभन्दा उन्नत उत्पादक मध्ये एक हो। भोल्भो आफ्नो गाडीमा उत्कृष्ट सुरक्षा फिचर प्रदान गर्नका लागि परिचित छ। हालै, कम्पनीले कथित रूपमा नयाँ प्रविधिमा काम गरिरहेको रिपोर्टहरू आएका थिए, जसले कार मालिकहरूलाई आफ्नो कारको विन्डशील्डलाई इन्टर्याक्टिभ डिस्प्लेमा रूपान्तरण गर्न अनुमति दिनेछ।

स्विडेनी अटोमोबाइल कम्पनीले यसका लागि इजरायली स्टार्टअप स्पेक्ट्रालिक्ससँग साझेदारी गरेको छ। यो प्रविधिले कारको विन्डशिल्डमा हेड अप डिस्प्ले (HUD) प्रदान गर्नेछ। एचयूडी डिस्प्लेले चालकलाई सबै आवश्यक जानकारीहरू विन्डशील्डमा देखाउनेछ, जस्तै गति, नेभिगेसन, समय, आदि।